Məhkəmə həbsdə olan jurnalist Aytac Əhmədovaya münasibətdə Konvensiyanın 8-ci maddəsinin pozulduğuna qərar verib

Avropa İnsan Haqları Məhkəməsi (AİHM) martın 11-də Azərbaycanla bağlı daha bir qərarını açıqlayıb.

Bundan əvvəl Avropa İnsan Haqları Məhkəməsi “Azadlıq” qəzetinin yayım direktoru, AXCP sədrinin köməkçisi Faiq Əmirlinin həbsinə görə Azərbaycan hökumətini 7500 avro cərimələyib.

AİHM-də qərar verilən digər iş isə jurnalist Aytac Əhmədovanın (Tapdıq) şikayəti ilə bağlıdır.

Ərizəçi iddia edib ki, 2015-ci ilin sentyabrında Meydan TV ilə əməkdaşlıq etdiyi üçün Daxili İşlər Nazirliyinin Mütəşəkkil Cinayətkarlıqla Mübarizə İdarəsinə getməyə məcbur edilib və orada xəbər portalı, onun fəaliyyəti ilə bağlı sorğu-suala tutulub. DİN əməkdaşları heç bir order və ya məhkəmə qərarı olmadan onun mənzilində axtarış apararaq kompüterini də götürüblər. Onun ailəsiylə evdə və çimərlikdə çəkdirdiyi bəzi şəxsi fotoşəkil və videogörüntülər, çox güman, saxta şəxslərə məxsus müxtəlif “Facebook” hesablarında yayımlanıb. Paylaşımlar ərizəçinin “dilindən asılmalı”, “hamının gözü önündə çılpaq asılmalı” və s. yazılarla müşayiət edilib.

Ərizəçi Avropa İnsan Hüquqları Konvensiyasının 6-cı (ədalətli məhkəmə araşdırması hüququ) və 8-ci (şəxsi və ailə həyatına hörmət hüququ) maddələrinə əsaslanaraq şəxsi həyatına hörmət hüququnun qorunmadığını və bu baxımdan, hökumət orqanlarının onun şikayətlərini araşdırmadığını iddia edir.

Məhkəmə bu işdə ərizəçiyə münasibətdə Konvensiyanın 8-ci (şəxsi və ailə həyatına hörmət hüququ) maddəsinin pozulduğuna qərar verib. Qərara əsasən, hökumət ərizəçiyə mənəvi zərər və xərc əvəzi 5 min 500 avro ödəməlidir.

2015-ci il sentyabrın 16-da müstəqil jurnalist Aytac Əhmədova küçədə saxlanaraq, DİN-in Baş Mütəşəkkil Cinayətkarlığa Qarşı Mübarizə İdarəsinə (BMCMİ) aparılmışdı. O, Meydan TV ilə əməkdaşlıqda günahlandırılırdı.

2024-cü il dekabrın 6-da Meydan TV-nin jurnalistləri polisin keçirdiyi əməliyyat nəticəsində saxlanılıblar.

Jurnalistlərin hər birinə Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb.

Dekabrın 8-də jurnalistlər Aytac Əhmədova (Tapdıq), Aysel Umudova, Aynur Qənbərova (Elgünəş), Natiq Cavadlı, Ramin Cəbrayılzadə (Deko), Xəyalə Ağayeva və Bakı Jurnalistika Məktəbinin direktor müavini Ülvi Tahirov barəsində 4 aylıq həbs qətimkan tədbiri seçilib.

Meydan TV və saxlanılan jurnalistlər ittihamları rədd ediblər.

Onlar məhz jurnalist fəaliyyətinə görə həbs olunduqlarını, peşə fəaliyyətlərilə bağlı təzyiqlə üzləşdiklərini deyiblər.

Meydan TV Azərbaycan hakimiyyətinin qanunsuzluqlarını, korrupsiya faktlarını işıqlandıran müstəqil media orqanıdır.

Bu səbəbdən həm ölkədəki insan hüquqları fəalları, həm də beynəlxalq təşkilatlar bu repressiyaların Azərbaycan hakimiyyətinin sifarişi ilə həyata keçirildiyini bəyan ediblər.