Həyat Yoldaşı: “Boynunun arxa hissəsində törəmə əmələ gəlib”

Keçmiş deputat, hazırda həbsdə olan iqtisadçı Nazim Bəydəmirlinin vəziyyətinin pisləşdiyi bildirilir.

Bu barədə onun həyat yoldaşı Fəridə Bəydəmirli sosial şəbəkədə yazıb.

“Bununla bağlı Ombudsman Aparatına elektron məktub ünvanlamışam və eyni zamanda vəkilimiz Aqil Layıc tərəfindən rəsmi müracət etmişik. Bir ay bundan öncə boynunun arxa hissəsində yaranmış karbakul (tükdibinin iltihabı nəticəsində) formalaşmış törəmə əmələ gəlib. Həbsxanada müdaxilə olunub, nəticədə törəmə qıcıqlanaraq böyüyüb və bərk kütləyə çevrilib. Gecikdirilmədən təcili cərrahi müdaxilə olunmalıdır. Bu məsələ ilə bağlı professor Adil Qeybulla ilə danışmışam, əgər icazə verilsə gedib yerində əməliyyat etməyə hazır olduğunu bildirdi. Bu günə qədər Nazim Bəydəmirlinin səhhətində zaman-zaman yaranmış sağlıq problemləri ilə bağlı saysız müraciətlərimə 5-6 ay sonra baxılıb və səthi yanaşılıb. Bu dəfə məsələ çox ciddidir, təcili əməliyyat olunmasa xəstənin böyrəklərində ciddi fəsadlar yaranacaq, ən qorxulusu meningit xəstəliyinə yol aça bilər”, – Fəridə Bəydəmirli bildirib.

2005-2010-cu illərdə 104 saylı Gədəbəy-Tovuz seçki dairəsindən Milli Məclisin deputatı olmuş Nazim Bəydəmirli 2023-cü ilin iyulun 4-dən həbsdədir.

Ona qarşı Cinayət Məcəlləsinin 182.2.4 (hədə-qorxu ilə tələb-etmə – xeyli miqdarda əmlak əldə etmək məqsədilə törədildikdə) və 182.2.2 (hədə-qorxu ilə tələb etmə – təkrar törədildikdə) maddələrilə ittiham irəli sürülüb.

İttihamlardan birində iddia edilir ki, sabiq deputat pay sahibi olduğu şirkətdə şərikini görüntülərlə şantaj edərək ondan 50 min manat pul tələb edib.

Digərinə görə isə Nazim Bəydəmirli 1996-cı ildə Rusiyanın Lipetsk şəhərində də hədə-qorxu ilə pul tələb edib.

Lakin o, ittihamların heç birini qəbul etmir, özünü “ekologiya məhbusu” sayır.

Nazim Bəydəmirli Gədəbəyin Söyüdlü kəndində baş vermiş etirazlarla əlaqələndirilərək həbs olunduğunu deyir.

Onun həbsindən bir neçə gün əvvəl hökumətə yaxın media orqanlarında Söyüdlü hadisələrinin təşkilatçıları qismində adlar hallandırılmışdı ki, onların sırasında Nazim Bəydəmirli də vardı.

Nazim Bəydəmirli özü də “Bandotdel”ə çağırılarkən oradan vəkilinə telefon zəngində Söyüdlü hadisələrinə görə saxlandığını bildirib.

Sentyabrın 30-da Bakı Ağır Cinayətlər Məhkəməsində çıxarılan hökmlə keçmiş deputat 8 il azadlıqdan məhrum edilib.

Kürdəxanıda yerləşən Bakı İstintaq Təcridxanasında olan Nazim Bəydəmirli 2024-cü il dekabrın 24-də 13 saylı Cəzaçəkmə Müəssisəsinə köçürülüb.

Həyat yoldaşı Fəridə Bəydəmirli bildirmişdi ki, Nazim Bəydəmirlinin saxlanma şəraiti pis olmaqla yanaşı, ən qəddar cinayətkarlarla – 20-25 il azadlıqdan məhrum olunmuş iyirmi məhkumla bir otaqda qalır.