USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“AbzasMedia işi” üzrə məhkəmə istintaqı başa çatdı, dövlət ittihamçısı çıxış üçün vaxt istədi
Mayın 16-da Bakı Ağır Cinayətlər Məhkəməsində “AbzasMedia işi” üzrə keçirilən məhkəmə prosesi davam etdirilib. Hakim Rasim Sadıxovun sədrliyi ilə keçirilən iclasda sənədlərin tədqiqi mərhələsində istintaq zamanı “AbzasMedia”nın ofisində aparılan axtarışla bağlı videogörüntülər nümayiş olunub.
Təqsirləndirilən şəxslərin vəkilləri bir sıra vəsatətlərlə çıxış etsələr də, məhkəmə həmin vəsatətləri təmin etməyib. Daha sonra məhkəmə istintaqının yekunlaşdığı elan edilib.
Dövlət ittihamçısı yekun çıxış üçün məhkəmədən vaxt istəyib. Növbəti məhkəmə iclası mayın 20-nə təyin olunub.
Xatırladaq ki, 2023-cü ilin noyabrında korrupsiya araşdırmaları ilə tanınan “AbzasMedia” nəşrinin 6 əməkdaşı – direktor Ülvi Həsənli, müavini Məhəmməd Kekalov, baş redaktor Sevinc Vaqifqızı, reportyorlar Nərgiz Absalamova və Elnarə Qasımova, araşdırmaçı jurnalist Hafiz Babalı saxlanılıb. 2024-cü ilin mayında isə “Azadlıq” radiosunun əməkdaşı, iqtisadçı Fərid Mehralızadə də bu iş üzrə həbs olunub.
İlkin mərhələdə jurnalistlərə qarşı qaçaqmalçılıq ittihamı irəli sürülsə də, 2024-cü ilin avqustunda ittihamlar daha da ağırlaşdırılıb. Hazırkı ittihamlara əsasən, onları 8 ildən 12 ilədək azadlıqdan məhrumetmə cəzası gözləyir.
Yerli və beynəlxalq hüquq müdafiə təşkilatları jurnalistlərin həbslərini siyasi motivli hesab edir və onların dərhal azadlığa buraxılması ilə bağlı çağırışlar edirlər.
