“Meydan TV işi” üzrə həbs olunan jurnalist Ülviyyə Əli Bakı İstintaq Təcridxanasından göndərdiyi məktubda səhhətinin ağırlaşdığını bildirib. Onun məktubu “JAMnews” saytı tərəfindən ictimailəşdirilib.

Ülviyyə Əli qeyd edir ki, saxlanmasından və polis zorakılığına məruz qalmasından 20 gün keçməsinə baxmayaraq, hələ də tibbi ekspertiza təyin olunmayıb. “Zorakılıqdan artıq 20 gün keçib, vaxtı uzatmaqla izləri silmək olar, amma sağlamlığıma dəyən zərəri silmək mümkün deyil. Çünki bu, özünü başqa formalarda büruzə verir”, – deyə o yazır.

Jurnalist bildirir ki, hər gün başağrısı, ürəkbulanma, başgicəllənməsi, göz qaralması hiss edir və bu səbəbdən gün ərzində 2-3 dəfə ağrıkəsici qəbul edir. Onun sözlərinə görə, bu simptomlar təsadüfi deyil və zorakılığın nəticəsi olaraq səhhətinə ciddi zərər dəyib: “Saxlanılandan bəri müxtəlif vaxtlarda qusmuşam, iki dəfə burnumdan qan gəlib. Şübhələnirəm ki, zorakılıqdan sonra səhhətimə ciddi ziyan dəyib”.

Ülviyyə Əli həmçinin bildirib ki, 2017-ci ildə beynində hipofiz vəzinin yanında 4 millimetrlik mikroadenoma aşkar edilib və o vaxtdan etibarən müntəzəm olaraq müalicə alıb. Lakin hazırda bu istiqamətdə heç bir tibbi yardım göstərilmir.

Jurnalist evindən tapıldığı iddia edilən 6,700 avronun ona aid olmadığını bir daha vurğulayıb: “30-dan çox jurnalistin eyni motivlərlə həbs olunduğu bir ölkədə, hətta pul özümə məxsus olsa belə, evdə saxlamaq axmaqlıqdır”.

Ülviyyə Əli 2019-cu ildən “Amerikanın Səsi” ilə əməkdaşlıq etdiyini, həmin media qurumu fəaliyyətini dayandırdıqdan sonra isə reportajlarını şəxsi sosial media hesablarında paylaşdığını bildirib. “Pula həris olanlar heç vaxt bunun mənasını dərk edə bilməz. Çünki jurnalistika mənim üçün pul deyil, vicdan məsələsidir”, – deyə o vurğulayıb.

O, “Meydan TV” ilə heç bir işgüzar əlaqəsinin olmadığını qeyd edib və bu cinayət işinə yalnız jurnalist fəaliyyətini məhdudlaşdırmaq məqsədilə cəlb edildiyini bildirib.

Ülviyyə Əli mayın 7-də saxlanılıb və ona qarşı Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb. O, saxlanılarkən polis tərəfindən telefonunun şifrəsini verməyə məcbur edilməsi üçün başına zərbələr endirildiyini və zorlama ilə hədələndiyini də bildirib.

Hazırda hüquq müdafiəçiləri və ailəsi jurnalistin səhhətinə ciddi nəzarət və dərhal tibbi yardım göstərilməsini tələb edirlər.