Azərbaycanın iri dövlət tenderlərini qazanan tikinti şirkətlərindən biri – “Elta Development” Qapalı Səhmdar Cəmiyyəti hazırda 8 milyon 584 min 772 manat vergi borcuna görə gündəmdədir.

Vergilər Nazirliyinin məlumatına görə, şirkətin borcu xüsusilə külli miqdarda hesab olunur və bu, ölkə üzrə ən yüksək borcu olan kommersiya qurumlarından biri statusunu verir.

Ad dəyişdi, borc qaldı

Məlumata görə, “Elta Development” QSC 2020-ci ildə “ND Company” QSC adı ilə dövlət qeydiyyatına alınıb. 2024-cü ildə isə ad dəyişikliyi ilə fəaliyyətini davam etdirib.

Tender qalibi, amma 2 min manatlıq kapital

Maraqlı məqamlardan biri də budur ki, cəmi 2 000 manat nizamnamə kapitalı ilə qeydiyyatdan keçmiş bu şirkət ötən il 25 milyon manatlıq dövlət tenderinin qalibi olub. Hər iki tender Qarabağ İqtisadi Rayonunda Bərpa, Tikinti və İdarəetmə Xidməti tərəfindən elan edilib və şirkət “ND Company” adı altında qalib seçilib.

Təmsilçidən və şirkətdən iz yoxdur

Rəsmi sənədlərdə “Elta Development” QSC-nin qanuni təmsilçisi kimi Cəlilov Əsədulla Həsən oğlu göstərilir. Lakin açıq mənbələrdə nə şirkətin fəaliyyəti, nə də bu şəxs haqqında hər hansı ictimai məlumat mövcuddur.

Şəffaflıq sual altındadır

Böyük məbləğli tenderlər qazanan, lakin çox aşağı nizamnamə kapitalına və külli miqdarda vergi borcuna sahib olan bu cür şirkətlərin fəaliyyəti ictimaiyyət arasında şəffaflıq və qanunçuluqla bağlı suallar doğurur.

Vergi borcunun səbəbləri və tender proseslərinin necə aparıldığına dair rəsmi açıqlama hələlik verilməyib.