Müstəqil jurnalist və siyasi məhbus Fatimə Mövlamlı ona qarşı Penitensiar Xidmətin əməkdaşları tərəfindən zorakılıq edildiyini açıqlayıb. Bu barədə o, Bakı İstintaq Təcridxanasından ictimaiyyətə ünvanladığı müraciətində məlumat verib.

Fatimə Mövlamlının sözlərinə görə, 2025-ci il iyunun 24-də, Xətai Rayon Məhkəməsinə aparılarkən konvoy taborunun 4-5 əməkdaşı tərəfindən fiziki təzyiqə məruz qalıb:

“Məhkəmə binasından çıxarılıb xidməti avtomobilə o qədər zorla mindirildim ki, sol qolum və sağ dizim xəsarət aldı. Üç gün ərzində sağ ayağımı qatlamaqda çətinlik çəkdim.”

Zərərçəkənin dediyinə görə, xəsarətlər təcridxananın tibb məntəqəsində sənədləşdirilib və məsələ ilə bağlı Penitensiar Xidmətin rəisi Mirsaleh Seyidova yazılı şikayət ünvanlanıb. Hüquq müdafiəçisi Azər Rəsulovla birgə hüquqi addımların atıldığı bildirilir.

Zorakılığın səbəbi: “Şüarların qarşısını almaq istəyirdilər”

Fatimə Mövlamlı baş verənləri ifadə azadlığının qarşısını almaq məqsədi ilə izah edir:

“Konvoy işçiləri məni sərt şəkildə ona görə dartıb apardılar ki, məhkəməmizə dəstək üçün gələn insanlar məni görməsin və eşitməsin. Amma bacarmadılar. Haqsız həbsimizə etiraz edən şüarları yenə də səsləndirdim.”

Onun sözlərinə görə, Xətai Rayon Məhkəməsi artıq müstəqil jurnalistlərə qarşı təqiblərin simvoluna çevrilib:

“Məhkəmə binası ətrafı faktiki olaraq polis nəzarətindədir, ictimaiyyət içəri buraxılmır, jurnalistlər təcrid olunur.”

Sonda: “Biz burada girovuq!”

Məktubun sonunda Fatimə Mövlamlı səhhətinin stabil olduğunu, lakin təcavüzkar davranışların dərhal dayandırılması lazım gəldiyini bildirib. O, məhkəmə binası qarşısında səsləndirdiyi şüarları da qeyd edib:
• “Biz burada girovuq!”
• “Müstəqil jurnalistlərə azadlıq!”
• “Qaçaqmalçı İlham Əliyevin özüdür!”