USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Ülvi Həsənli aclıq aksiyasına başladığı üçün işgəncəyə məruz qalıb – həyat yoldaşı danışır
Beş günlük tam məlumat boşluğundan sonra “AbzasMedia”nın həbsdə olan direktoru Ülvi Həsənli ilk dəfə ailəsi ilə əlaqə saxlayıb.
Bu barədə iyunun 30-da jurnalistin həyat yoldaşı Rübabə Quliyeva məlumat yayıb. Onun sözlərinə görə, Ülvi Həsənli Umbakı təcridxanasına köçürüldüyü gündən aclıq aksiyasına başladığı üçün karsa salınıb və işgəncəyə məruz qalıb.
“Səsi çox zəif gəlirdi. Dedi ki, 5 gündür aclıq edir. Heç bir şəxsi əşyası verilməyib, əynindəki paltarları belə dəyişmək imkanı olmayıb. Aclığa görə təzyiq və təhdidlərə məruz qalıb, ona işgəncə edilib”, – deyə Rübabə Quliyeva bildirib.
O qeyd edib ki, təcridxana rəhbərliyi Ülvi Həsənli ilə görüşə icazə vermir, səbəb kimi isə onların rəsmi nikahda olmamasını göstərir. Halbuki cütlüyün azyaşlı övladları var. Həmçinin, jurnalistin telefonla əlaqə hüququnun da davamlı olub-olmayacağı bilinmir.
Ülvi Həsənlinin dediyinə görə, onunla bağlı qanunsuz qərarlara Penitensiar Xidmətin Əməliyyat-Rejim işləri üzrə rəisi Fikrət Qafarov imza atıb.
Qeyd edək ki, iyunun 20-də Bakı Ağır Cinayətlər Məhkəməsində “AbzasMedia işi” üzrə hökm oxunub. Ülvi Həsənli, Sevinc Vaqifqızı, Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, Məhəmməd Kekalov isə 7 il 6 ay müddətinə azadlıqdan məhrum edilib.
Onlar barələrində irəli sürülən ittihamları rədd edir və həbslərinin jurnalistik fəaliyyətləri ilə – xüsusilə korrupsiya araşdırmaları ilə bağlı olduğunu bildirirlər.
Həm yerli, həm də beynəlxalq hüquq-müdafiə təşkilatları jurnalistlərin dərhal azad olunmasına çağırır və həbsləri siyasi sifariş kimi qiymətləndirirlər.
