USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“AbzasMedia” jurnalistləri Umbakı həbsxanasına köçürülməyə etiraz edir – Ülvi Həsənli aclıq aksiyasına başlaya bilər
“AbzasMedia işi” üzrə həbs olunan jurnalistlər — Ülvi Həsənli, Məhəmməd Kekalov, Hafiz Babalı və Fərid Mehralızadə iyunun 26-da Bakı İstintaq Təcridxanasından Umbakı (Sabunçu rayonu, 12 saylı cəzaçəkmə müəssisəsi) həbsxanasına köçürülüblər. Bu barədə məlumatı onların yaxınları verib.
Ülvi Həsənlinin ailə üzvləri bildirir ki, Umbakı həbsxanasında Bakı İstintaq Təcridxanasında olduğu kimi canlı, fiziki təmaslı görüşlərə icazə verilmir. Yalnız şüşə arxasından, telefonla danışıqla görüşmək mümkündür. Həsənli bildirib ki, burada saxlanılmaqda davam edəcəyi təqdirdə, buna etiraz olaraq aclıq aksiyasına başlayacaq.
Müdafiə tərəfi köçürülməni qanunsuz hesab edir. Jurnalistlərin vəkili Zibeydə Sadıqova bildirib ki, Bakı Ağır Cinayətlər Məhkəməsinin hakimi Rasim Sadıxov iyunun 20-də keçirilən məhkəmə iclasında təqsirli bilinən şəxslərin hökm qanuni qüvvəyə minənədək Bakı İstintaq Təcridxanasında qalacağını açıq şəkildə elan edib. Vəkil köçürülmənin bu qərara zidd olduğunu vurğulayıb.
Eyni vaxtda “AbzasMedia”nın yaydığı məlumata əsasən, 15 il azadlıqdan məhrum edilən sülh fəalı Bəhruz Səmədov da Umbakı həbsxanasına köçürülənlər arasındadır.
Penitensiar Xidmətdən məsələ ilə bağlı hələlik rəsmi açıqlama verilməyib.
Xatırladaq ki, iyunun 20-də Bakı Ağır Cinayətlər Məhkəməsində “AbzasMedia” işi üzrə hökm elan edilib. Jurnalist Ülvi Həsənli, Sevinc Abbasova (Vaqifqızı), Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, Məhəmməd Kekalov isə 7 il 6 ay azadlıqdan məhrum ediliblər.
“AbzasMedia işi” çərçivəsində həbslər 2023-cü ilin noyabrından başlayıb. Saxlanılan jurnalistlər barələrində irəli sürülən ittihamları qəbul etmir, bu həbslərin korrupsiya araşdırmaları ilə bağlı olduğunu və siyasi sifariş əsasında həyata keçirildiyini bildirirlər. Yerli və beynəlxalq hüquq-müdafiə təşkilatları da bu həbsləri siyasi motivli sayır və jurnalistlərin azad olunmasına çağırışlar edirlər.
