Meydan TV-nin baş redaktoru Aynur Elgünəş ABŞ-da yerləşən Qadınların Beynəlxalq Media Fondu (IWMF) tərəfindən təsis edilən “Qadın Jurnalistlərə Ədalət Mükafatı”na (Justice for Women Journalists Award) layiq görülüb.

Təşkilat 2025-ci il üçün bu nüfuzlu beynəlxalq mükafatı yalnız Aynur Elgünəşə təqdim etdiyini açıqlayıb. Mükafat hər il haqsız yerə həbs edilmiş qadın jurnalistlərin cəsarətini, peşəkarlığını və ictimai əhəmiyyət daşıyan işlərini tanıtmaq məqsədilə verilir.


Mükafat noyabrda Nyu-Yorkda təqdim olunacaq

Mükafatın rəsmi təqdimat mərasimi 2025-ci ilin noyabrında Nyu-York şəhərində keçiriləcək. Bu, Azərbaycan jurnalisti üçün böyük beynəlxalq tanınma kimi qiymətləndirilir.

IWMF bundan əvvəl, 2012-ci ildə Azərbaycandan Xədicə İsmayılı “Jurnalistikada Cəsarət” mükafatı ilə təltif etmişdi.


Aynur Elgünəş 2024-cü ildə həbs olunub

Xatırladaq ki, Aynur Elgünəş 2024-cü il dekabrın 6-da Meydan TV-nin digər əməkdaşları ilə birlikdə saxlanılıb. Ona qarşı Cinayət Məcəlləsinin 206.3.2-ci maddəsi ilə – qaçaqmalçılıq (əvvəlcədən əlbir olan bir qrup şəxs tərəfindən törədildikdə) ittihamı irəli sürülüb. Məhkəmə onun barəsində 4 aylıq həbs qətimkan tədbiri seçib.

Eyni gün Meydan TV əməkdaşları Ramin Cəbrayılzadə (Deko), Aysel Umudova, Aytac Əhmədova (Tapdıq), Xəyalə Ağayeva, Natiq Cavadlı da saxlanılmışdı.


Jurnalistlər ittihamları rədd edir

Həbs olunan jurnalistlərin evlərində axtarışlar aparılıb, telefon və kompüterləri müsadirə edilib. Onlar özlərini təqsirli bilmir, həbslərin jurnalist fəaliyyətləri və hakimiyyətə qarşı tənqidi mövqeləri ilə əlaqəli olduğunu bildirirlər.

Bundan sonra Meydan TV ilə əməkdaşlıq edən bir sıra jurnalistlər də saxlanılıb. Onlar arasında Şəmşad Ağayev (Ağa), Nurlan Libre (Qəhrəmanlı) və Fatimə Mövlamlı da var.

Hazırda oxşar ittihamlarla 30-a yaxın jurnalist və ictimai fəal həbsdə saxlanılır. Rəsmi qurumlar isə bu həbslərin siyasi motivli olmadığını bildirir.


Beynəlxalq reaksiyalar

Aynur Elgünəşin mükafata layiq görülməsi yerli və beynəlxalq mediada diqqətlə qarşılanıb. Beynəlxalq hüquq-müdafiə təşkilatları və Qərb rəsmiləri Azərbaycan hakimiyyətini jurnalistləri azad etməyə və ifadə azadlığını təmin etməyə çağırıblar.