Həbsdə olan jurnalist, Meydan TV-nin baş redaktoru Aynur Elgünəş Bakı İstintaq Təcridxanasından yazdığı məktubda yeganə ailə üzvü kimi təqdim etdiyi itinə – Maks adlı dördayaqlı ev heyvanına görüş hüququnun tanınmasını tələb edib.

Elgünəş məktubunda qeyd edir ki, psixoloji və emosional baxımdan güclü bağlılıq hiss etdiyi Maks adlı it onun üçün yalnız ev heyvanı deyil, həm də ailə üzvüdür. Onun sözlərinə görə, 6 aydır təcridxanada saxlanılır və bu müddət ərzində Maksla görüşməsinə icazə verilməyib.

“Mənim Maksla görüşmək istəyim, tələbim bəziləri tərəfindən gülüşlə qarşılanır, ələ salınır. Halbuki mədəni insanlar evində saxladığı canlını övladından seçmir”, – deyə Elgünəş yazır.

Jurnalist qeyd edir ki, bu hüquq nə yerli qanunvericiliklə yasaqlanıb, nə də təhlükə yaradır. Lakin buna baxmayaraq, Penitensiar Xidmət rəhbərliyinə etdiyi dəfələrlə müraciətlər cavabsız qalıb. O, Penitensiar Xidmətin rəisi Mirsaleh Seyidova yazdığı açıq məktubların da nəticə vermədiyini bildirib.

Elgünəş eyni zamanda BMT-nin “Nelson Mandela” qaydalarına istinad edərək qeyd edir ki, həbsdə olan şəxslərin ləyaqətinə hörmət edilməli və onların psixoloji rifahı qorunmalıdır: “Əgər it məhkumun emosional və ya psixoloji sabitliyində əsas rol oynayırsa, onunla görüşə icazə verilməməsi qeyri-insani rəftar kimi qiymətləndirilə bilər”.

O, həmçinin Azərbaycanın qoşulduğu Avropa İnsan Hüquqları Konvensiyasının 8-ci maddəsini – şəxsi və ailə həyatına hörmət hüququnu xatırladaraq bildirir ki, Maksla əlaqə onun bu hüququnun bir hissəsidir.

Jurnalist məktubunda sağlamlıq durumu ilə bağlı da narahatlığını bölüşüb. Onun sözlərinə görə, uzun illər boyu 12 dəfə əməliyyat keçirib, əlil statusundadır və hazırda daha bir əməliyyat gözləyir. Lakin bu vəziyyəti azadlığa çıxmaq üçün əsas kimi istifadə etmək istəmir: “Mən jurnalist kimi həbs olunmuşam, əlil olunduğum üçün azad olunmaq istəmirəm”.

Aynur Elgünəş məktubunun sonunda beynəlxalq və yerli hüquq müdafiəçilərinə, heyvansevərlərə və insan hüquqları sahəsində çalışan qurumlara səslənib və bu məsələyə diqqət yetirilməsini istəyib. “Maks həyatımın mənasına çevrilib və mənəvi işgəncə çəkirəm. Mənim yeganə ailə üzvümlə görüşmək haqqım tanınmalıdır”.

Hazırda Elgünəşin səhhətində ciddi problemlər yarandığı, təzyiqinin təhlükəli səviyyəyə yüksəldiyi bildirilir. Vəkilləri və yaxınları onun Maksla görüşməsinin həm psixoloji sabitliyi, həm də sağlamlığı üçün vacib olduğunu deyirlər.