Bu gün, iyulun 5-də “Abzas Media”nın baş redaktoru Sevinc Vaqifqızı 36 yaşını həbsxanada qeyd edir. Beynəlxalq “Sərhədsiz Reportyorlar” (RSF) təşkilatı bununla bağlı bəyanat yayaraq onun və daha 24 jurnalistin dərhal azadlığa buraxılmasını tələb edib.

“Onun anası qızına tort gətirəcək, lakin onu ancaq dəmir barmaqlıqlar arasından ötürə biləcək”, — deyə bəyanatda qeyd olunur.

RSF bu mənzərəni həm “absurd”, həm də ədalətsiz” adlandırıb. Təşkilat bildirib ki, Sevinc Vaqifqızı və digər “Abzas Media” əməkdaşlarına qarşı irəli sürülmüş ittihamlar əsassızdır və bu həbslər Azərbaycanda müstəqil jurnalistikaya qarşı sistematik repressiyaların bir hissəsidir.

RSF: “Onların cəsarəti jurnalistikanın ali dəyərlərini təcəssüm etdirir”

RSF-nin redaksiya direktoru Ann Bokande bildirib:

“Sevinc Vaqifqızının və həmkarlarının cəsarəti jurnalistikanın ən ali dəyərlərini təcəssüm etdirir. Onların dərhal azadlığa buraxılmasını tələb edirik və beynəlxalq diplomatik dairələri də Bakıya təzyiq göstərməyə çağırırıq.”

“Abzas Media işi” — ədalətsizlik simvoluna çevrilib

İyunun 20-də Bakı Ağır Cinayətlər Məhkəməsində “Abzas Media işi” üzrə 7 jurnalistə hökm oxunub. Onlar “xarici valyuta qaçaqmalçılığı” və digər maliyyə cinayətlərində təqsirləndirilərək 7 ildən 9 ilədək azadlıqdan məhrum ediliblər:
• Ülvi Həsənli, Sevinc Vaqifqızı, Hafiz Babalı, Fərid Mehralızadə — 9 il
• Nərgiz Absalamova, Elnarə Qasımova — 8 il
• Məhəmməd Kekalov — 7 il 6 ay

Jurnalistlər hökm oxunan zaman hakimlərə arxa çevirərək etirazlarını bildiriblər.

Vaqifqızı: “Biz onsuz da azadıq”

Sevinc Vaqifqızı çıxışında belə deyib: “Hakimiyyətin qorxduğu şey, bizim qorumağa çalışdığımız həqiqətdir. Ümid edirəm, nə vaxtsa daxilinizdə hördüyünüz həbs divarlarını uçurub azadlığa çıxarsınız. Biz isə onsuz da azadıq.”

Jurnalist Fərid Mehralızadə isə məhkəmə barədə bildirib: “Bu hökm hakimlərin yox, bizi həbs etdirməyi əmr edənlərin qərarıdır.”

Vəkillər: İttihamlar siyasi sifarişdir

İyunun 10-da keçirilən məhkəmə iclasında bütün vəkillər jurnalistlərə qarşı ittihamların əsassız olduğunu bildirərək bəraət tələb ediblər. Elnarə Qasımovanın vəkili Bəhruz Bayramov:

“Siz bu işi mühakimə etmirsiniz, sadəcə göstərişləri icra edirsiniz.”

Azərbaycanda mətbuat azadlığı geriləyir

Hazırda Azərbaycanda 25 jurnalist həbsdədir. Onların əksəriyyəti “xarici valyuta qaçaqmalçılığı” kimi ittihamlarla saxlanılıb. RSF-nin 2025-ci il Dünya Mətbuat Azadlığı İndeksində Azərbaycan 180 ölkə arasında 167-ci yeri tutur.

Bu doğum günü Sevinc Vaqifqızının azadlıqdan yoxsul şəraitdə qeyd etdiyi, lakin jurnalist həmrəyliyi və beynəlxalq dəstəyin səsini daha da gücləndirdiyi bir günə çevrilib.