Prezident İlham Əliyev Milli Onkologiya Mərkəzinin maddi-texniki bazasının gücləndirilməsi məqsədilə 650 min manat vəsait ayrılması barədə sərəncam imzalayıb. Vəsait Azərbaycan Respublikasının 2025-ci il dövlət büdcəsində nəzərdə tutulan Prezidentin Ehtiyat Fondundan ayrılıb.

Sərəncama əsasən, Azərbaycan Respublikasının Maliyyə Nazirliyi göstərilən məbləğdə maliyyələşməni təmin etməli, Nazirlər Kabineti isə sərəncamdan irəli gələn məsələlərin həllini həyata keçirməlidir.

Vəsait kimə rəhbərlik etdiyi müəssisəyə ayrılıb?

650 min manat ayrılan Milli Onkologiya Mərkəzinin baş direktoru — Cəmil Əziz oğlu Əliyev — Prezident İlham Əliyevin əmisi oğludur. Cəmil Əliyev, tanınmış onkoloq-cərrah və akademikdir. O, 1990-cı ildən — artıq 35 ilə yaxındır — Milli Onkologiya Mərkəzinə rəhbərlik edir.

Qeyd edək ki, Cəmil Əliyev ümummilli lider Heydər Əliyevin qardaşı, tanınmış dövlət xadimi və tibb professoru Əziz Əliyevin oğludur. Eyni zamanda, Cəmil Əliyevin oğlu Əziz Əliyev də həmin mərkəzdə — baş-boyun şişləri şöbəsinin aparıcı elmi işçisi və onkoloq-cərrahı kimi çalışır.

Təhlükəli xəstəliklər, böyük pullar, ailəvi nəzarət

Milli Onkologiya Mərkəzi Azərbaycanda onkoloji xəstəliklər üzrə ən iri ixtisaslaşmış dövlət müəssisəsidir. Mərkəz həm də onkoloji dərmanların alınması və paylanmasında, eləcə də bahalı tibbi avadanlıqların idxalında əsas qərarverici struktur hesab olunur.

Prezidentin ailə üzvünə məxsus struktura böyük məbləğdə vəsait ayırması ictimai nəzarət və şəffaflıq çağırışlarını yenidən gündəmə gətirə bilər.

Foto.info.az məsələnin ictimai rezonans doğura biləcək tərəflərini diqqətdə saxlayacaq.