Azərbaycan Respublikasının Prezidenti İlham Əliyev Gəndob–Xaçmaz–Yalama–Rusiya Federasiyası ilə dövlət sərhədi və bu istiqamətdə yerləşən bir sıra kəndləri birləşdirən avtomobil yolunun əsaslı təmiri ilə bağlı sərəncam imzalayıb.

Sərəncama əsasən, on iki min nəfərdən artıq əhalinin yaşadığı 13 yaşayış məntəqəsini birləşdirən Gəndob–Xaçmaz–Yalama–Rusiya Federasiyası ilə dövlət sərhədi (28 km)–Köhnə Xaçmaz–Xaspoladoba–Gəncəli–Bəbəli–Əzizli–Əhmədoba–Müşviq–Müşkür–Hacıqazma–Hacıəhmədoba–Şərifoba–Qaracəlli–Xəzərli marşrutu üzrə avtomobil yolu əsaslı şəkildə yenidən qurulacaq.

Layihənin icrası üçün Azərbaycan Respublikası Prezidentinin 2025-ci il 10 yanvar tarixli, 445 nömrəli Sərəncamı ilə təsdiq olunmuş “2025-ci il dövlət büdcəsində dövlət əsaslı vəsait qoyuluşu (investisiya xərcləri)”ndə nəzərdə tutulmuş 1.19.21-ci yarımbənd üzrə 1,5 milyon manat ilkin olaraq Azərbaycan Avtomobil Yolları Dövlət Agentliyinə ayrılıb.

Sərəncama əsasən:
• Maliyyə Nazirliyi ayrılmış vəsaitin maliyyələşdirilməsini təmin edəcək;
• İqtisadiyyat Nazirliyi isə avtomobil yolunun təmirinin davam etdirilməsi üçün tələb olunan əlavə maliyyə vəsaitini 2026-cı il dövlət büdcəsində nəzərə alacaq;
• Nazirlər Kabineti sərəncamdan irəli gələn digər məsələləri həll etməlidir.

Bu infrastruktur layihəsi regionun nəqliyyat şəbəkəsinin inkişaf etdirilməsi, əhalinin yaşayış şəraitinin yaxşılaşdırılması və kəndlərarası əlaqələrin möhkəmləndirilməsi baxımından mühüm əhəmiyyət daşıyır.