İyulun 14-də Bakı Ağır Cinayətlər Məhkəməsində hüquq müdafiəçisi Rüfət Səfərovun cinayət işi üzrə məhkəmə baxış iclası keçirilib. Prosesə hakim Aygün Qurbanovanın sədrliyi ilə start verilib.

Məhkəmənin əvvəlində Səfərovun vəkili vəsatətlə çıxış edib. O, müdafiə hüquqlarının təmin edilməsi məqsədilə müvəkkilinin istintaq təcridxanasına daxil olarkən tibbi müayinədən keçdiyinə dair sənədin məhkəməyə təqdim olunmasını istəyib. Hakimlər kollegiyası vəsatəti təmin edib və müvafiq sənədin təqdim olunması qərara alınıb.

Daha sonra dövlət ittihamçısı Rüfət Səfərova qarşı irəli sürülmüş ittiham aktını elan edib. İttihama əsasən, Səfərovun Novxanı qəsəbəsində yerləşən bağ evini satmaq adı ilə zərərçəkmiş şəxs — Natiq İmanquliyevdən 60 min manatdan çox pul aldığı, lakin əmlakı təhvil vermədiyi bildirilir. İddialara görə, bu məsələyə görə tərəflər arasında yaranmış mübahisə zamanı Səfərov İmanquliyevi bıçaqla yaralayıb.

Səfərov isə irəli sürülmüş ittihamları qəti şəkildə rədd edib. Onun sözlərinə görə, torpaq sahəsinin yalnız bir hissəsi Natiq İmanquliyevə satılıb və tərəflər arasında qarşılıqlı razılaşma olub. O əlavə edib ki, Natiq İmanquliyevi ilk dəfə yalnız 2024-cü il dekabrın 3-də — özü polis tərəfindən saxlanıldığı gün görüb. Hüquq müdafiəçisi baş verənlərin sifarişli xarakter daşıdığını və onun ictimai fəaliyyətinə görə hədəf alındığını bildirib.

Məhkəmə iclası sentyabrın 8-dək təxirə salınıb.

Qeyd edək ki, Rüfət Səfərov 2024-cü ilin dekabrın 3-də həbs edilib. O, Azərbaycan Respublikası Cinayət Məcəlləsinin 178.2.2 (dələduzluq — təkrar törədildikdə) və 221.3 (xuliqanlıq — silah və ya silah qismində əşya tətbiq edilməklə törədildikdə) maddələri ilə ittiham olunur.

Rüfət Səfərov tanınmış hüquq müdafiəçilərindəndir. O, daha əvvəl Ombudsman Aparatında, həmçinin Daxili İşlər Nazirliyində çalışıb, son illər isə siyasi məhbusların müdafiəsi və insan haqları sahəsində aktiv fəaliyyəti ilə tanınıb. Müdafiə tərəfi onun cinayət təqibini siyasi sifariş kimi qiymətləndirir.