USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Hüquq müdafiəçisi Zəfər Əhmədovun evində axtarış aparılıb, özü və oğlu Baş Prokurorluğa aparılıb
Hüquq müdafiəçisi Zəfər Əhmədov və oğlu, Azərbaycan Xalq Cəbhəsi Partiyasının (AXCP) keçmiş fəalı Fuad Əhmədli iyulun 17-də səhər saatlarında Baş Prokurorluğa aparılıblar. Bu barədə məlumatı Zəfər Əhmədov özünün “Facebook” səhifəsində paylaşıb.
Əhmədovun sözlərinə görə, səhər saat 7 radələrində onların yaşadıqları mənzilə Baş Prokurorluğun müstəntiqi, altı nəfər əməliyyatçı və iki hal şahidi gəlib. Eyni zamanda evdə axtarış aparılıb və bütün texniki cihazlar götürülüb.
O bildirib ki, onlar illər öncə açılmış və artıq bağlandığını düşündükləri bir cinayət işi üzrə şahid qismində dindiriliblər. Dindirmədən sonra axşam saat 18:00-da sərbəst buraxılıblar.
Zəfər Əhmədov 2019-cu ildə yaradılmış və hazırda təsisçilərindən biri — Rüfət Səfərov — həbsdə olan “Müdafiə Xətti” hüquq müdafiə təşkilatının həmtəsisçisidir.
Fuad Əhmədli isə 2016-cı ilin avqust ayında həbs edilmiş və dörd il azadlıqdan məhrum edilmişdi. O zaman əvvəlcə Fətullah Gülənin tərəfdarı kimi təqdim edilsə də, daha sonra mobil operator şirkəti olan “Azefon”da işlədiyi müddətdə müştərilərə aid məlumatları yaymaqda ittiham olunmuşdu. O, 2020-ci il avqustun 18-də həbs müddətini başa vuraraq azadlığa çıxıb.
Zəfər Əhmədov bildirib ki, şahid statusunda olan şəxsin evində axtarış aparılması qanunaziddir. O, həmçinin bu hadisələr fonunda oğlunun da işdən çıxarıldığını qeyd edib.
Hazırda məsələ ilə bağlı aidiyyəti dövlət qurumları hər hansı açıqlama verməyiblər.
