Bakı İstintaq Təcridxanasının rəisi Elnur İsmayılov “Abzas Media”nın həbsdə olan baş redaktoru Sevinc Vaqifqızına sərinkeş verilməsi qarşılığında onun haqqında yayılan yazıların silinməsini təklif edib.

Bu barədə Sevinc Vaqifqızı ailəsinə məlumat verib. Onun sözlərinə görə, iyulun 19-da təcridxana rəisi bu təklifi jurnalist Nərgiz Absalamovaya çatdırıb:

“Rəis deyib ki, əgər sərinkeş verməklə Sevinc üçün yaxşı oğlan olacağamsa və bu yazılar silinəcəksə, verim. Nərgiz isə cavab verib ki, Sevinc buna heç vaxt razı olmaz.”

Sevinc Vaqifqızı da bu təklifi qəti şəkildə rədd etdiyini bildirib:

“Haqqım olanı mənə verməlidirlər. Bazarlıq etmirəm. Sərinkeş qadağan olunan əşyalar siyahısında deyil və içəri buraxılmalıdır. Digər məhbuslara necə icazə verilirsə, biz də ayrı-seçkiliyə məruz qalmamalıyıq.”

O qeyd edib ki, həmin gün təcridxana rəisinin müavini Əhəd Abdıyev də onun kamerasına gələrək, məhbuslara sərinkeş vermək kimi öhdəliklərinin olmadığını deyib. Vaqifqızı isə cavabında təcridxanada havalandırma və soyutma sistemlərinin olmadığını bildirib və belə şəraitdə sərinkeşin zəruri olduğunu vurğulayıb:

“Məhbusa çatacaq sərinkeş təcridxananın mağazasında 35 manata satılır. Məhbus içəridə işləyib pul qazanmır ki, 35 manat verib alsın. Bu vəsaiti müəssisə təmin etməlidir.”

Sevinc Vaqifqızının sözlərinə görə, iyulun 18-də 71-ci kamerada saxlanılan qadın məhbus isti hava şəraitinə görə huşunu itirib.

“Növbətçi nəzarətçilər soyuducudan litrlərlə soyuq suyu onun üstünə töküblər ki, özünə gəlsin. Rəis o dustağın səhhətini düşünsün, məni yox. Mən yalnız öz sərinkeşimi istəyirəm, başqa bir tələbim yoxdur,” – deyə jurnalist bildirib.

Vaqifqızı daha əvvəl, iyulun 17-də yaydığı məlumatda ailəsinin onun üçün gətirdiyi sərinkeşə həftələrdir icazə verilmədiyini bildirmişdi. Onun sözlərinə görə, məsələ ilə bağlı müraciət etdiyi rəis müavini Əhəd Abdıyev isə bu qərarı belə əsaslandırıb:

“Ürəyimiz belə istəyir. Keçən il ürəyimiz istədi, sərinkeşi içəri buraxdıq. Bu il isə ürəyimiz belə istəyir, icazə vermirik.”

Hazırda Sevinc Vaqifqızı “Abzas Media işi” çərçivəsində həbsdə saxlanılır. O, jurnalist fəaliyyətinə görə siyasi motivli təqibə məruz qaldığını bildirir.