Həbsdə olan elmi tədqiqatçı və sülh fəalı Bəhruz Səmədov başladığı aclıq aksiyasını dayandırıb.

Bu barədə ictimai fəal Əmrah Təhməzov məlumat yayıb. Onun sözlərinə görə, sentyabrın 11-də Səmədov nənəsi Zibeydə Osmanova ilə telefon danışığında səhhətinin pisləşdiyini və həkimlərin onu müayinə etdiyini bildirib.

“Zibeydə nənə Bəhruza yalvarıb ki, aclığı dayandırsın, çünki bu yaşında onun aclığına dözə bilmir. Nənəsinin təkidi ilə Bəhruz aclıq aksiyasını dayandırıb. Bəhruzu azad edin”, – deyə Təhməzov “Facebook” səhifəsində yazıb.

Bəhruz Səmədov sentyabrın 6-da Bakı Apellyasiya Məhkəməsinin onun barəsində çıxarılan hökmü qüvvədə saxlamasına etiraz olaraq aclıq aksiyasına başlamışdı.

Çexiyanın Karlov Universitetinin doktorantı olan Səmədov 2024-cü il avqustun 21-də Dövlət Təhlükəsizliyi Xidmətinin əməkdaşları tərəfindən həbs olunub. 2025-ci il iyunun 23-də Bakı Ağır Cinayətlər Məhkəməsi onu 15 il müddətinə azadlıqdan məhrum edib.

O, dövlətə xəyanətdə ittiham olunur. İttihama əsasən, Səmədov Ermənistan xüsusi xidmət orqanları ilə əməkdaşlıq edib.

Lakin o, məhkəmə proseslərində bu ittihamları rədd edib, heç vaxt Dağlıq Qarabağın Ermənistan ərazisi olduğunu demədiyini vurğulayıb və daim sülh tərəfdarı olduğunu bəyan edib. Onun sözlərinə görə, məqsədi müharibənin qarşısını almaq, insanların ölümünün qarşısını almaq olub.