“Amnesty International” beynəlxalq insan haqları təşkilatı Azərbaycanda mətbuat azadlığının durumu ilə bağlı yaydığı yeni hesabatda ölkədə müstəqil medianın demək olar ki, tamamilə sıradan çıxarıldığını bildirib.

Hesabatda vurğulanır ki, Azərbaycanda siyasi motivlərlə həbs edilən media nümayəndələrinin sayı ölkənin 2001-ci ildə Avropa Şurasına üzv olduğu vaxtdan bəri ən yüksək həddə çatıb. Təşkilat qeyd edir ki, hazırda ölkədə fəaliyyət göstərən müstəqil media qurumu qalmayıb.

2022-ci ilin dekabrında qəbul edilmiş “Media haqqında” qanunun bu vəziyyəti daha da ağırlaşdırdığı bildirilib. “Amnesty International” hesab edir ki, həmin qanun ölkədə müstəqil jurnalistikanın fəaliyyətini əngəlləmək məqsədi daşıyıb.

“Abzas Media, Meydan TV, Toplum TV və Kanal 13 kimi media qurumları insan hüquqları və digər həssas mövzuları işıqlandırdıqları üçün uzun illər sistemli təzyiqlərlə üzləşiblər. Bu təzyiqlər sırasında qeyri-qanuni reydlər, qeydiyyatın əsassız şəkildə rədd edilməsi, bank hesablarının dondurulması kimi hallar var”, – deyə hesabatda qeyd olunub.

Təşkilat əlavə edib ki, saxlanılan jurnalistlərə qarşı irəli sürülən ittihamlar – o cümlədən qaçaqmalçılıq, qanunsuz sahibkarlıq, pulların yuyulması və vergidən yayınma – çox vaxt sübutlardan məhrumdur və əsas məqsəd tənqidi səsləri susdurmaqdır.

Hesabatda həmçinin həbsdə olan jurnalistlərin saxlanma şəraitinin ağır olduğu, onların tibbi xidmət və ailələri ilə ünsiyyət imkanlarının məhdudlaşdırıldığı bildirilir.

“Amnesty International” Azərbaycan hökumətini siyasi motivlərlə həbs edilmiş bütün jurnalistləri qeyd-şərtsiz azad etməyə və onların tibbi ehtiyaclarını təmin etməyə çağırıb. Təşkilat beynəlxalq ictimaiyyəti də bu məsələni gündəmdə saxlamağa və Azərbaycan hökumətinə təzyiqləri artırmağa çağırıb.