Həbsdə olan elmi tədqiqatçı və sülh fəalı Bəhruz Səmədov sentyabrın 5-dən quru aclığa başlayacağını bildirib. İctimai fəal Əmrah Təhməzovun sözlərinə görə, Səmədov bu barədə telefon zəngində nənəsinə məlumat verib.

Fəal Bakı Apellyasiya Məhkəməsində şikayətinin təmin olunmadığını, məhkəmə proseslərinin “çox ədalətsiz” keçdiyini qeyd edib və “bütün vicdanlı insanlardan” onun günahsız olduğunu, sülh və ədalət istədiyi üçün həbs olunduğunu paylaşmağı xahiş edib.

Çexiyanın Karlov Universitetinin doktorantı Bəhruz Səmədov 2024-cü il avqustun 21-də Dövlət Təhlükəsizliyi Xidmətinin əməkdaşları tərəfindən saxlanılıb və 2025-ci il iyunun 23-də Bakı Ağır Cinayətlər Məhkəməsinin hökmü ilə 15 il müddətinə azadlıqdan məhrum edilib. O, dövlətə xəyanətdə ittiham olunur, lakin məhkəmələrdə heç vaxt Dağlıq Qarabağı Ermənistan ərazisi kimi tanımadığını və daim sülh tərəfdarı olduğunu vurğulayıb.