Avropa İttifaqının Cənubi Qafqaz üzrə xüsusi nümayəndəsi Toyvo Klaar Azərbaycanla Ermənistan arasında atəşkəsin pozulması ilə bağlı narahatlığını bildirib.

“Avropa İttifaqı regionda baş verənləri yaxından izləyir. Bütün istiqamətlərdə atışma dayandırılmalıdır. Ardıcıl görüşlərin müsbət dinamikasını davam etdirmək və danışıqlar masası arxasında Ermənistana, Azərbaycana və bütün regiona fayda verəcək nəticələr əldə etmək vacibdir”, - o qeyd edib.

Rəsmi Bakı və Yerevan bir-birini atəşkəsi pozmaqda ittiham edir.

Azərbaycan Müdafiə Nazirliyi bildirir ki, iyunun 13-də iki istiqamətdə atışma olub.

Nazirliyin bəyanatına görə, saat 19:15-ə yaxın “Rusiya sülhməramlılarının müvəqqəti yerləşdiyi Azərbaycan ərazisindəki qanunsuz erməni silahlı dəstələrinin üzvləri” Şuşa rayonu istiqamətində yerləşən mövqeləri atıcı silahlardan atəşə tutub. Məlumatda vurğulanır ki, “qeyd olunan istiqamətdə adekvat cavab tədbirləri görülüb”.

Bundan öncə Müdafiə Nazirliyi bildirib ki, saat 17:40-da Ermənistan Silahlı Qüvvələrinin bölmələri Azərbaycan ordusunun Naxçıvan Muxtar Respublikasının Sədərək rayonunda yerləşən mövqelərini minaatanlar da daxil olmaqla, iriçaplı silahlardan atəşə tutub.

“Ordumuzun bölmələri tərəfindən cavab tədbirləri görülür” – nazirlikdə əlavə ediblər.

Bundan öncə iyunun 13-də Ermənistanın Müdafiə Nazirliyi bildirib ki, Azərbaycan Silahlı Qüvvələrinin Yerasx (Arazdəyən-red.) istiqamətində Ermənistan ərazisini atəşə tutması nəticəsində mülki avtomobilə və bir başqa obyektə ziyan dəyib.

Ermənistan Xarici İşlər Nazirliyi bildirib ki, Azərbaycan Yerevanda xarici kapitalın cəlbi ilə tikilməkdə olan metallurgiya zavodunu atəşə tutmaqla Ermənistanın beynəlxalq aləmdə tanınmış sərhədlərinə, insan hüquqlarına və beynəlxalq hüquqa etinasızlıq nümayiş etdirir.

Nazirlik bildirib ki, Yerasx kəndindəki Barekamutyun metallurgiya zavodunun tikilməsi Azərbaycanı “bərk narahat edib”.

Rəsmi Bakı bəyan edib ki, Ermənistan bu ərazidə razılaşdırılmamış fəaliyyətlə beynəlxalq ekoloji standartları pozur.

Öz növbəsində Azərbaycan Xarici İşlər Nazirliyi Ermənistan Xarici İşlər Nazirliyinin bəyanatına reaksiya verib.

Nazirlik qeyd edir ki, “Azərbaycanın Ermənistanda tikilməkdə olan metallurgiya zavodunu məqsədyönlü şəkildə hədəfə alması barədə Ermənistan Xarici İşlər Nazirliyinin bəyanatını” qəbuldilməz hesab edir.