Mühacirətdə yaşayan jurnalist, Azərbaycan Xalq Parlamentinin Rəyasət Heyətinin üzvü Kamran Nəsirlinin sosial şəbəkə hesabları və internet saytının kiberhücuma məruz qaldığı bildirilir.

Bu barədə Kamean nəsirli məlumat verib. Təqdim olunan məlumatlara görə, hücumun Azərbaycandan həyata keçirildiyini göstərən texniki məlumatlar mövcuddur. Kiberhücum zamanı jurnalistin rəqəmsal platformalarına müdaxilə edildiyi və bəzi məlumatların silindiyi bildirilir. Hücumun konkret kim tərəfindən həyata keçirildiyi barədə isə hələlik təsdiqlənmiş məlumat yoxdur.

Hadisədən dərhal sonra hesablar üzərində nəzarətin bərpası, məlumatların təhlükəsizliyinin təmin edilməsi və istifadəçilərlə əlaqənin yenidən qurulması istiqamətində tədbirlərə başlanılıb.

Hadisənin Kamran Nəsirlinin polis tərəfindən ona daxil olan telefon zəngi barədə məlumatı ictimailəşdirməsindən sonra baş verdiyi qeyd olunur. Hücumla həmin paylaşım arasında birbaşa əlaqənin olub-olmadığı hələlik müəyyən edilməyib.

Bundan əvvəl də “Hürriyyət”, “Turan”, “Novator” və digər media resurslarının müxtəlif vaxtlarda kiberhücumlara məruz qaldığı barədə məlumatlar yayılıb. Həmin hallarda jurnalist materiallarının silinməsi və media platformalarının fəaliyyətinə müdaxilə edilməsi barədə iddialar səsləndirilib.

Son illərdə jurnalistlərin, ictimai fəalların və media qurumlarının rəqəmsal təhlükəsizliyi ilə bağlı narahatlıqların artdığı bildirilir. Bu baxımdan sosial şəbəkə hesablarının və media resurslarının qorunması, məlumatların ehtiyat nüsxələrinin yaradılması və hesabların əlavə təhlükəsizlik vasitələri ilə mühafizəsi xüsusi əhəmiyyət daşıyır.