Bu barədə onun özü məlumat verib.

O, qeyd edib ki, bu barədə qərar sentyabrın 1-də Vəkillər Kollegiyanın Rəyasət Heyətinin iclasında qəbul olunub:

"Mən Vəkillər Kollegiyasından çıxarılmam barədə qərardan şikayət vermişdim. Şikayətdə bildirmişdim ki, iclasda iştirak etməmişdim deyə, barəmdə qərar verilməsi doğru deyildi. Bugün, sentyabrın 1-də şikayətimə baxıldı və o təmin olundu. Əvvəlki qərar ləğv olundu və barəmdə olan rəyə yenidən İntizam Komissiyasında baxılacaq. Beləliklə vəkil fəaliyyətim bərpa olunub".

Elçin Sadıqovun vəkillik fəaliyyəti iyulun 6-da dayandırılıb.

Vəkillər Kollegiyasının Rəyasət Heyəti “haqqın.az” saytının rəhbəri Eynulla Fətullayevin şikayəti əsasında bu qərarı çıxarıb.

Fətullayevin şikayəti isə “Baku Steel Company” Məhdud Məsuliyyətli Cəmiyyətin Müşahidə Şurasının keçmiş rəhbəri, həbsdə olan Rasim Məmmədovun ( mənimsəmə və başqa qanunsuz əməllərdə ittiham edilir) ailəsindən 20 min manat pul alınıb, “Xural.com” saytının təsisçisi Əvəz Zeynallıya (o da həbsdədir) verilməsi iddiasıyla bağlıdır. Fətullayev iş adamının vəkili olmuş Sadıqovun bu işdə vasitəçilik etdiyini vurğulayıb və məsələnin araşdırılmasını tələb edib.

Fətullayevin şikayəti Vəkillər Kollegiyasına 2022-ci ilin sentyabrında daxil olub.

Elçin Sadıqov onunla bağlı bundan əvvəl verilən qərarla razı deyildi.

Üstəlik, sayt rəhbəri də ittihami qəbul etmirdi.