"Rusiya hazırda Azərbaycanla münasibətləri inkişaf etdirir və çətin ki, bu, Ermənistanın xoşuna gəlsin, amma bu cür əlaqələri təkcə Rusiya deyil, Paşinyan hakimiyyəti də inkişaf etdirir. Mənə elə gəlir ki, Paşinyan hökuməti hazırda Bakı və Ankara üçün İrəvanda ən əlverişli hökumətdir".

Bunu "Rusarminfo"ya müsahibəsində Dövlət Dumasının MDB işləri üzrə komitəsi sədrinin birinci müavini Konstantin Zatulin deyib.

"O ki qaldı 2020, 2023-cü illərdə Qarabağ məsələsi, hərbi münaqişə və onun nəticələri ilə bağlı baş verən hadisələrə, bəli, təəssüf ki, bu, Rusiyanın hər şeyə qadir olmadığının əksidir. Rusiya şəraitə uyğunlaşmağa məcburdur. O, faktiki olaraq Ukraynada Qərblə daha ciddi və mühüm qarşıdurmada iştirak edir. Və əgər indi bununla bağlı hər hansı dəyişiklik baş versə və Rusiya bu münaqişədən özünün mümkün hesab etdiyi şəkildə çıxsa, mən əminəm ki, Rusiya öz mövqelərində, o cümlədən Zaqafqaziyada möhkəmlənməyə başlayacaq. Amma razıyam, Rusiya son illər Qafqazda əvvəlki hallarda gördüyümüz kimi qətiyyətli davranmayıb", - deputat bildirib.

Rusiya-Ermənistan münasibətlərinə toxunan Zatulin vurğulayıb: "Bizim bazamızın orada saxlanmasının səbəbi Ermənistana bu məsələdə kömək etməkdir: Ermənistanda hansı hakimiyyət olmasından asılı olmayaraq, biz Ermənistanın güclü dövlət olmasında maraqlıyıq".