Azərbaycan prezidentinin keçmiş kürəkəni, iş adamı və müğənni Emin Ağalarov Özbəkistanda yeni kurort kompleksi — “Sea Breeze Uzbekistan” layihəsini həyata keçirməyə hazırlaşır. Layihə Çarvak su anbarının sahilində inşa ediləcək və ümumi dəyərinin 5 milyard dollar olduğu bildirilir.

Lakin iri miqyaslı turizm mərkəzinin tikintisi ölkədə ictimai narazılıqla qarşılanıb. Sosial şəbəkələrdə istifadəçilər kampaniyalar təşkil edərək layihənin dayandırılmasını tələb edir, ərazidə ekoloji fəlakət riski olduğunu bildirirlər.

Ekoloji fəal Mutabar Xuşkavtova xəbərdarlıq edib ki, layihə düzgün icra olunmazsa və Çarvak suyunun çirklənməsi baş verərsə, region yeganə içməli su mənbəyindən məhrum ola bilər. Onun sözlərinə görə, bu cür layihələr yalnız hərtərəfli ekoloji audit və ictimai iştirakla həyata keçirilməlidir.

Ekspertlər isə layihənin yerləşdiyi ərazinin seysmik aktiv zonada olduğunu, həmçinin inşaatın flora və faunaya mənfi təsir göstərə biləcəyini bildirirlər.

Emin Ağalarov Azərbaycanda Xəzər sahilində yerləşən məşhur “Sea Breeze Resort” kompleksinin sahibidir. Onun bu modeli Özbəkistana daşımaq istəyi bəzi dairələr tərəfindən “özəl maraqların ekoloji təhlükə bahasına reallaşdırılması” kimi dəyərləndirilir.

Rəsmi qurumlar hələlik ictimai narazılıqlara münasibət bildirməyib.