Təhsil nazirliyinin növbəti “sertifikasiya oyunu”
Dünyanın koronovirus bəlası ilə üz-üzə qaldığı bir vaxtda “məsti-xumar” mahnısına oynayan Azərbaycan təhsili bir qrup həvəskar “alim”in əlində təcrübə laboratoriyasına çevrilib. Gülümsərovun limonla mandarini calaq edərək limandra yetişdirməsi sayaq bu “alim”lər axşam yatıb yuxuda gördüklərini səhər təhsil sistemində tətbiq etməkdən yorulmurlar. Summativ yoxlamaqdan “məsti-xumar” olan binəva müəllimlər o qədər yersiz sənədlərlə,boş-boş məsələlərlə yüklənirlər ki, dərs keçməyə sadəcə vaxtları və həvəsləri qalmır. Təhsil nazirliyi islahat adı ilə əslində Azərbaycan təhsilini batırır. Batan gəminin isə qurbanları yenə də müəllimlər və şagirdlər olacaq. Nazirliyin yüksək çinliləri son anda uzaqbaşı iqtisadiyyat nazirliyində zadda özlərinə iş tapacaqlar.

Yəqin ki, çoxlarınız müəllimlərin sertifikasiyası məsələsi haqqında eşitmisiniz. Bu barədə məlumatlar verilib və müəllimlər intizar içərisində nə olacağını gözləyirlər. Aldığımız məlumatlara görə, nazirlik artıq sertifikasiyanın reallaşdırılması üçün Nazirlər kabinetinə müraciət edib. Beləliklə tezliklə yenidən biçarə müəllimlər C.Bayramovun növbəti təcrübəsinin obyektinə çevriləcəklər.

Hörmətli nazirə və onun komandasına sertifikasiya öncəsi bəzi suallarımız var. Əcəba Azərbaycan təhsilinin bütün problemləri həll olunub ki,müəllimləri yenidən imtahana çəkirsiniz? Əslində görünən odur ki, problemlər içərisində itib-batan müəllimlər növbəti dəfə hansısa maliyyə fırıldaqlarının,maxinasiyaların qurbanına çevrilir. Böyük məbləğli pulların silinəcəyi sertifikasıyanın təhsildə rüşvətin yeni güclü dalğasının yaranmasına səbəb olacağını isə təxmin etmək üçün heç də münəccim olmağa ehtiyac yoxdur. Diaqnostik qiymətləndirmədən sonra məktəblərdə az bal toplayan müəllimlərin hansı yollarla soyulduğunu biz də bilirik. Yəqin ki, sertifikasiya oyunu onsuz da yerlərdə sürünən müəllim nüfuzunun sonuncu çöküşünə hesablanıb. İqtisadi çətinliklər girdabında boğulan, ailəsini dolandırmaq üçün Hadı Rəcəblinin məsləhətinə uyğun olaraq bənnalıq,fəhləlik edən müəllimləri bunca sıxışdırmağa, incitməyə nə ehtiyac var? Bəlkə Ceyhun Bayramov dövlətdən narazı düşən böyük bir müəllimlər ordusu formalaşdırmaq üçün çalışır? Hər halda indiki durumda,heç bir zərurət olmadığı halda belə bir addımı atmağa başqa ad vermək olmaz. Cəmiyyətin ən həssas,dövlətin ən güvənilir bir təbəqəsini ambisiyalarına, yalançı islahatçı imicinə qurban vermək olmaz. Ceyhun Bayramov bunun hansı sonuclarla nəticələnəcəyini təxmin etməlidir. Bilmirsə komandasından kimsə bunu ona izah etməlidir.

P.S. Komanda demişkən yenicə “Amerika tətili”ndən qayıdan nazirliyin mətbuat xidmətinin rəhbəri Cəsarət Valehovu xatırlamaq yerinə düşər. Təhsil nazirliyinin mətbuat xidmətini şəxsi dəftərxanasına çevirən bu şəxs öz əməlləri ilə nazirlik və cəmiyyət arasında dərin uçurum formalaşdırır. Ceyhun Bayramovu tam informasiya blokadasında saxlayan C.Valehov bu yolla naziri cəmiyyətdən təcrid edib. Öz mətbuat xidmətinin utopik məlumatları ilə “məsti-xumar” olan C.Bayramov isə reallığı görmür. Ona bunu görməyə heç imkan da vermirlər!