Vətəndaş və İnkişaf Partiyasının (VİP) BƏYANATI
Azərbaycan hakimiyyəti son illərdə siyasi müxalifətə və alternativ fikir daşıyıcılarına qarşı intensivləşdirdiyi repressiv siyasətə son qoymaq əvəzinə, opponentlərinin sıradan çıxarılmasına və hüquq pərdəsi altında "neytrallaşdırılması"na yönəlik addımlarını davam etdirməkdədir. Bu çərçivədə xüsusi amansız münasibətlə qarşılaşan Vətəndaş və İnkişaf Partiyasının (VİP) sədri Əli Əliyevin 2022-ci ildə ard-arda dörd qondarma ittihama söykənən qanunsuz məhkəmə hökmləri nəticəsində üst-üstə 4 il 5 ay müddətinə azadlıqdan məhrum edilməsi ölkədə hökm sürən siyasi ab-havanı qiymətləndirməyə imkan verir. Hakimiyyət əsas rəqiblərinə münasibətdə mövqeyini dəyişmək niyyətində olmadığını hər imkanda açıq büruzə verməklə siyasi düşmənçiliyin aradan qaldırılmasında maraqlı olmadığını nümayiş etdirir.

2023-cü yanvarın 25-də Bakı Apellyasiya Məhkəməsinin hakimi Elmar Rəhimovun VİP sədri Əli Əliyevin Sabunçu Rayon Məhkəməsinin 22 noyabr 2022-ci il tarixli hökmündən verdiyi şikayəti təmin etməməsi hakimiyyətin siyasi müxalifəti arqumentlərlə deyil, administrativ resursların gücü ilə susdurmaq metoduna sadiqliyini bir daha göstərir. Hakim Sabunçu rayon Məhkəməsinin VİP sədri barəsində "ədalətli" hökm çıxardığını çox qısa müddətdə "müəyyənləşdirərək" həmin instansiyanın qərarını qüvvədə saxladı. Azərbaycanda məhkəmə-hüquq sisteminin fəaliyyət prinsipi hər kəsə məlum olduğu üçün bu qərar qətiyyən təəccüb doğurmur.

Vətəndaş və İnkişaf Partiyası (VİP) Əli Əliyev barəsində Sabunçu rayon Məhkəməsinin çıxardığı qanunsuz hökmün qüvvədə saxlanılmasını qətiyyətlə pisləyir və bu addımı siyasi müxalifətin məhvinə hesablanmış addım kimi qiymətləndirir. VİP hakimiyyəti növbəti dəfə vətəndaş hüquq və azadlıqlarına hörmətlə
yanaşmağa çağırır və Əli Əliyevin, o cümlədən, bütün siyasi məhbusların azadlığa buraxılmasını tələb edir !

VİP mətbuat xidməti
26.01.2023