İsrailin Baş naziri Benyamin Netanyahu ötən gecə məhkəmə islahatlarını müvəqqəti dayandırdığını açıqlayıb. O, böyük etiraz dalğasına səbəb olan qanun layihəsi ilə bağlı “real dialoq üçün real fürsət” vermək istədiyini bildirib.

Foto.info.az “Jerusalem Post” nəşrinə istinadla xəbər verir ki, Netanyahu belə bir bəyanatla milli təhlükəsizlik naziri İtamar Ben Qvirlə gərgin danışıqlardan sonra çıxış edib. MTN rəhbəri qanun layihəsinin dayandırılacağı təqdirdə istefa verəcəyi ilə hədələyib.

Hakim “Likud” partiyasının sədri bildirib ki, onun hökuməti sonda hakimiyyət qolları arasında balansı bərpa edəcək və islahatları yenidən həyata keçirəcək. İsrailin Baş naziri ölkənin təhlükəli yolla getdiyini və onun vətəndaş müharibəsinə çevrilməsinə imkan verməyəcəyini vurğulayıb.

Qeyd edək ki, İsrail baş nazirinin açıqlamasından sonra həmkarlar ittifaqları elan edilən tətili ləğv etsə də, hökumət əleyhinə nümayişlər davam edir. Etirazçılar bazar ertəsi axşam Knesset (İsrail parlamenti) yaxınlığındakı bir neçə yolu və Qüdsdəki Kabel körpüsünü qısa müddətə bağlayıblar.

Nümayişlərin təşkilatçıları Netanyahunun bəyanatına baxmayaraq, nümayişlərin martın 28-də və gələn şənbə günü də davam edəcəyini açıqlayıblar. Aksiya iştirakçıları, əsasən, paytaxt Təl-Əvivdə cəmləşəcəklərini qeyd etsələr də, müxtəlif şəhərlərdə də aksiyalar ola biləcəyini dilə gətiriblər.

ABŞ və Böyük Britaniya Benyamin Netanyahunun məhkəmə islahatları prosesini dayandırmaq qərarını alqışlayıb. Ağ Evin fikrincə, bu, konsensusa gəlmək üçün əlavə vaxt verəcək.

Xatırladaq ki, İsraildə bir neçə aydır ki, Netanyahu hökumətinin başlatdığı, Ali Məhkəmənin səlahiyyətlərinin məhdudlaşdırılmasını və hakimlərin seçiminə icra hakimiyyətinə nəzarətin verilməsini nəzərdə tutan məhkəmə islahatlarına qarşı nümayişlər davam edir. Müxalifətin fikrincə, bu islahat dövlətin demokratik əsaslarını sarsıdır. Netanyahu isə iddia edir ki, bu qanun layihəsinin məqsədi məhkəmələrə nəzarət etmək deyil, onları balanslaşdırmaq və diversifikasiya etməkdir.