Azeriqaz IB-nin xidmətindən olduqca narazıyam.
Gallus Pay kartları da, onların sayğacı da, proqram təminatı da zaydır.

Məsələn sıx-sıx kart düşür koda, Milliön aparatı karta pul yükləmir, deyir kartda pul var, sayğac da bildirir ki kartda pul yoxdur. Mütləq getməlisən Asan Kommunala. Vaxt və pul itkisi.

Bir həftə əvvəl bənzər bir problemə görə Asan Kommunalda idim. Bu axşam olan isə ümumiyyətlə adamı çilədən çıxardı. Karta 50 azn pul yüklədim ki, mərkəzi istilik sistemini qoşum. Lakin sayğac onu nəinki görmədi, hətta özü də tam sıfırlandı və kartı da sıfırladı, və yenə qaldıq qazsız. Yenə sabah getməliyəm Asan Kommunala.

Ümumiyyətlə qeyd etməliyəm ki, əhaliyə xidmət qurumlarının bu qəbildən siyasətləri olduqca yarıtmazdır. NFC tipli smart sayğaclar taxılanda deyildi ki, bunlara mobil telefonla ödəmə mümkün olacaq. Hanı? Hansı məqsədlə əvvəlki tipli klassik sayğaclar dəyişdirilib yerinə bu işgəncə makinəsini quraşdırıblar?

Niyə bu qərarı verənlər hansısa məsuliyyət daşımırlar?

Məsələ barəsində Antiinhisar və İstehlak Bazarına Nəzarət Dövlət Xidmətinə məlumat verdim, çünki bir istehlakçı kimi keyfiyyətli xidmət ala bilmirəm, yalnışlığın cəriməsini də mən çəkirəm, qazsız qalmaqla və Asan Kommunala qaçmaqla. Azeriqazın hansısa işçisi əziyyət çəkmir, o əziyyəti mən çəkirəm. Mən də başlayım şikayətlərə, görək nə tədbir görüləcək. Məsələni məhkəməyə götürüb onlardan maddi və mənəvi zərərin ödənilməsini tələb edəcəm.