Tofiq Yaqublunun həbsi və İnzibati Həbs olunanların Binəqədi Saxlanılma Mərkəzində mövcud olan anti-insani şəraitlə bağlı Milli Şuranın Bəyanatı

Milli Şura Koordinasiya Mərkəzinin üzvü, ölkənin tanınmış demokratiya və insan hüquqları liderlərindən biri olan Tofiq Yaqublu 23 dekabr 2022-ci il tarixində Bakı şəhərinin mərkəzində keçirilən dinc aksiya zamanı növbəti dəfə şərlənərək həbs edilib.

Heç bir inzibati xəta törətmədiyi halda Səbail rayon məhkəməsi ona əsassız və qanunsuz şəkildə 30 sutka inzibati həbs cəzası verib.

Tofiq Yaqublu 6 yanvar 2023-cü il tarixindən etibarən saxlandığı İnzibati Həbs Olunanların Binəqədi rayonunda yerləşən Saxlanılma Mərkəzində mövcud olan qeyri-insani duruma etiraz olaraq aclıq aksiyasına bağlayıb.

Bununla o həmin Mərkəzdə saxlanılan şəxslərə qarşı həyata keçirilən anti-humanist, aşağılayıcı rəftara son qoyulmasını tələb edir.

Belə ki, həmin Mərkəzdə saxlanılma inzibati xəta törətmiş şəxslər üçün gerçək işgəncəyə çevrilir. Saxlanılanlar bütün saxlanılma müddətində ailə üzvlərilə görüş və onların gətirdiyi sovqatı qəbul etmək hüququndan məhrum edilirlər. Bəzi hallarda hətta vəkillərlə görüşlərin konfidensiallığı pozulur.

Bundan əlavə, Azərbaycan dövlət büdcəsindən məhkumların və müvəqqəti saxlanılanların qidalandırılması üçün böyük vəsaitlər ayrılsa da o vəsaitlər korrupsiya yolu ilə mənimsənilir, məhkumlara və saxlanılanlara verilən yeməklər isə o qədər keyfiyyətsiz olur ki, həmin şəxslər onları qəbul etməkdənsə, ac qalmağı üstün tuturlar.

Binəqədi Mərkəzində saxlanılan şəxslərin ailələri tərəfindən gətirilən sovqatların Pandemiya bəhanəsi ilə qəbul edilməməsi oradakı durumu daha da acınacaqlı edir.

Tofiq Yaqublunun xəstə olduğu və ciddi müalicə kursu keçməli olduğu halda normal qidadan da məhrum edilməsi, 23 dekabr tarixindən faktiki qidalana bilməməsi və 6 yanvardan etibarən tam aclığa başlaması onun səhhətinə geridönməz xarakterli zərbələr vura bilər.

Milli Şura qurumun Koordinasiya Mərkəzinin üzvü Tofiq Yaqublunun qanunsuz və əsassız inzibati həbsinə etiraz edir.

Milli Şura Azərbaycan hakimiyyətindən məhkumlara və İnzibati qaydada saxlanılanlara qarşı qeyri-insani və aşağılayıcı davranışlara son qoymağı tələb edir.

Məhkum edilən və saxlanılan şəxslərin Azərbaycan Respublikası qanunvericiliyi ilə qorunan hüquqlarına hörmət olunmalı, onlara maneəsiz şəkildə doğmaları və vəkilləri ilə görüş imkanı yaradılmalıdır. Məhkum edilən və saxlanılan şəxslərin normal qidalandırılması, xəstələrin müalicə müəssisəsinə köçürülərək tibbi nəzarət altına alınması dövlətin konstitusion vəzifəsidir, dövlət bu sahədə mövcud olan korrupsiya və səhlənkarlıq hallarının qarşısını almalı, öz konstitusion vəzifəsini icra etməlidir.