Əziz izləyicilər, dəyərli dostlar,

Bildiyiniz kimi Azərbaycan Respublikası prezidentinin 11 yanvar 2023-cü ildə təqdiqlədiyi mürtəce “Siyasi partiyalar haqqında” Azərbaycan Respublikasının Qanununun fundamental azadlıqlara zidd olan 4.7.-ci maddəsinə görə "Siyasi partiyanın dövlət qeydiyyatına alınmadan fəaliyyət göstərməsinə yol verilmir."

Odur ki, ADR Partiyası olaraq fəaliyyətimizi Qanunun tələblərinə uyğunlaşdırmaq məcburiyyətindəyik. Bununla əlaqədar olaraq Partiyanın mərkəzi icra strukturlarının buraxılması və təyinatlı rəhbər şəxslərin fəaliyyətlərinə xitam verilməsinə dair sərəncam imzalamışam.

Partiyanın seçkili orqanlarının fəaliyyətinə dair yekun qərarı növbəti Ali Məclis verəcək. Bu barədə sizi məlumatlandıracam.

Bilin ki, “Siyasi partiyalar haqqında” yeni Qanunun qəbulunun əsas məqsədlərindən biri də prezident adminstrasiyasının göstərişi ilə Ədliyyə Nazirliyinin dövlət qeydiyyatından 4 dəfə imtina etdiyi, Apelyasiya Məhkəməsinin işə baxmadığı, Ali Məhkəmənin işi icraata götürmədiyi ADR Partiyasının fəaliyyətinə bu yolla əngəl yaratmaq idi. Buna qısa müddətdə olsa da nail ola bildilər, çox çəkməz.

Böyük ehtimalla fəaliyyətimizi bundan sonra ADR Hərəkatı olaraq davam etdirəcəyik, Azərbaycanda demokratik dəyərlərlə idarəolunan hüquqi dövlət və rifah cəmiyyəti quruculuğu həfədəfimizdir. ADR-in Azərbaycan xalqının dəstəyi ilə bu hədəflərə tezliklə çatacağına şübhəmiz yoxdur, daha böyük güclə və iddia ilə mübarizəmiz davam edəcək.

Əsas odur ki, müstəqilliyimizi qeydiyyata qurban vermədik, bu yolda Partiya rəhbərliyi olaraq vahid mövqe nümayiş etdirdik, dəyərlərimizə sonadək sadiq qaldıq, hakimiyyət ADR-in qeydiyyat məsələsini sövdələşmə predmetinə çevirə bilmədi.

Uğurlar ADR!

Gubad İbadoglu