Əziz izləyicilər və dəyərli dostlar,

Öncə, sizə rus qoşunlarının Qarabağdan çıxarılması ilə bağlı əvvəlki postuma göstərdiyiniz diqqətə, sərgilədiyiniz mövqeyə və dəstəyə görə minnətdarlığımı bildirirəm. Şərhdə "bunu necə edə bilərik" suallarına ayrıca olaraq yazacam deyə cavab vermişdim. Bu istiqamətdə təkliflərimi sizin müzakirənizə təqdim edirəm. Müzakirədə fəal iştirakınıza əminliklə əvvəlcədən təşəkkürümü bildirirəm.

Bildiyiniz kimi rus qoşunlarının Qarabağdan çıxarılması Azərbaycan üçün strateji məsələdir. Hesab edirəm ki, müstəqliiyimizin dönməzliyi və bütün ölkə ərazisində suverenliyimizin təminatı üçün biz bununla bu gündən etibarən hər gün məşğul olmalı, ictimaiyyətin mövqeyini həm Azərbaycan və həm də Rusiya hakimiyyətlərinin nəzərinə vaxtında çatdırmalıyıq ki, daha pis nəticələrlə üzləşməyək, 10 noyabr 2020-ci ildə olduğu kimi arzuolunmaz süprizlərlə qarşılaşmayaq.

Ukraynanın əyalətlərində keçirdiyi referendum və ilhaqı ilə bir daha işğalçı libası geyinən rus qoşunları Qarabağda sülhməramlı ola bilməz. Bildiyiniz kimi Qarabağın ermənilər yaşadığı və rusların nəzarət etdiyi ərazimizdə ikinci dil rus dilidir, ikili vətəndaşlıq adı ilə rus pasportlarının paylanmasına, sərhəddə də bufer zona yaradıb. orda rus qoşunlarının yerləşdirilməsinə hazırlıq gedir, Azərbaycan hakimiyyətinə növbəti 5 ildə də rus qoşunlarının Qarabağda qalması üçün sənəd imzalamaq təklif olunur. Ukraynalıların, gürcülərin, moldovanların qarşılaşdığı fəlakətlə Azərbaycanın da qarşılaşmaması üçün indidən fəaliyyətə başlamalıyıq. Odur ki, sizin dəstəyinizə güvənməklə, hər kəsin töhfə verə biləcəyi aşağıdakı təklifləri müzakirəyə çıxarıram.

1. Azərbaycan prezidenti və Xarici İşlər Nazirliyi Rusiyanın Ukraynanın ilhaq etdiyi ərazilərini tanımaması barədə bəyanatla çıxış etsin.
2. "Rus qoşunları Qarabağdan çıxın" şüarı ilə Rusiyanın Azərbaycan səfirliyi qarşısında etiraz aksiyası keçirilsin. Azərbaycan Demokratiya və Rifah (ADR) Partiyası oktyabrın 7-də saat 14-də bu aksiyanı təşkil edəcəyi barədə Bakı Şəhər İcra Hakimiyyətinə məlumat göndərib.
3. "Rus qoşunları Qarabağdan çıxın" çağırışı ilə imza toplama kampaniyası başlasın. Oktyabrın 1-dən bu kampaniyaya start veriləcək, linkini burda paylaşacam.
4. #qarabağdanrusqoşunlarıçıxarılsın haştaqı və "Rus qoşunları Qarabağdan çıxarılsın" yazılmış banerlərlə sosial şəbəkələrdə oktyabrın 1-dən noyabrın 20-dək kampaniya başlasın. Banerləri hazırlayıb sizə təqdim edəcəm.
5. "Rus qoşunları Qarabağdan çıxarılsın" tələbi ilə prezident Putinə siyasi partiyalar və ictimai təşkilatların müraciəti göndərilsin. Müraciəti hazırlayıb, müzakirəyə təqdim edəcəm.
6. 10 noyabr 2022-ci ildə "Rus qoşunları Qarabağdan çıxarılsın" şüari ilə bütün ölkə ərazisində etiraz aksiyası keçirilsin. ADR Partiyası olaraq təşəbbüs irəli sürsək də digər partiyalarla və ictimai təşkilatlarla birlikdə Təşkilat Komitəsi yaratmağa səy göstərəcəyik.

Əziz izləyicilər, dəyərli dostlar, bu məsələdə hər kəsin mövqeyi önəmlidir, buyurun münasibət bildirin.