8 aprel saat 10:38-də telefonuma zəng olundu. Zəng edən şəxs özünü DTX əməkdaşı kimi təqdim edib bildirdi ki, 10 aprel saat 10:00-da Bakıda bizim idarədə olmalısınız. Səbəbini soruşdum. Dedi ki, bu, hansısa profilə rəy yazmağımla bağlıdır. Profilin adını soruşdum. "Rossoner"mi, ya da "Rossomed" kimi nəsə bir ad çəkdi. Dedim, nə rəyi yazmışam? Dedi, həmin profil silinib, qalanını burada müzakirə edərik.

Cavab verdim ki, rəsmi bildiriş yoxdur, Bakıya gəlməyə yolpulum da yoxdur, üstəlik, bir rəyə görə Bakıya niyə gəlim, Lənkəranda olan şöbənizə çağırın, araşdırın. Bəs, buradakı şöbələriniz nə üçündür?

Dedi ki, yox, Bakıya gəlməlisiniz.
Mən də dedim ki, rəsmi bildiriş göndərin və yol xərcimi də qarşılayın, gəlim.
Dedi ki, yol xərcini qarşılayacağıq.

Sonra danışdığım şəxsdən telefonu başqası aldı, təhdidlə "Elə etmə ki, səni başqa cür aparaq" dedi.
"Nə cür aparırsınız, aparın. Yığmızısınız insanları boğaza daha" dedim və qarşı tərəf telefonu söndürdü.

Bu günsə bir az əvvəl kənd icra nümayəndəsi zəng etmişdi. Dedi ki, bildirişi götürməlisən DTX-nın şöbəsindən. Dedim, zəhmət çəkib kəndə göndərsinlər.
Göndərdilər.
Gələn əməkdaş nəzakətlə bildirişi təqdim etdi.

Dedim bəs, yolpulu hanı? Dedi, Bakıda idarədə verəcəklər.
Bildirişdən məlum oldu ki, şahid qismində DTX-nın istintaq baş idarəsinə çağrılıram. Sabah saat 10:00-da orada olmalıyam.

Narkotik istifadə etmirəm, satışı ilə məşğul olmuram. Silah istifadə etmirəm, onun da satışı ilə məşğul deyiləm. Hansısa dini radikal cərəyanların üzvü deyiləm. Onda bu çağrılma nə üçündür?

Fəaliyyətim də feysbuk üzərində, göz qabağındadır. Eyni zamanda Kanal13.TV-də müəllifi olduğum "Yazın ki, oxuyaq" verilişini, Azərbaycan Saatında da müəllifi olduğum "Düz xətt" verilişini aparıram.
Bunları etməkdə hansısa cinayət və qəbahət yoxdur.

Üzvü olduğum AXCP-nin rəhbərliyinə bu haqda məlumat vermişəm.
Dostum, vəkil Bəhruz bəylə də danışmışam bu haqda.

Allah köməyimiz olsun.

Comərd Qaya