Qubad İbadoğlunun qanunsuz həbsi ilə bağlı beynəlxalq təzyiq gücləndikcə hakimiyyətin qulbeçələri də qızışır, marionet media "xoda düşür". Əvvəl-əvvəl qapını aralayıb böhtançıları bir-bir buraxırdılarsa, indi sürü təfəkkürü ilə yaşayanları elə sürü şəklində hücuma göndərirlər. Qapı da taybatay açılıb. "Məscidin qapısı açıqdır" məsəli...
Cavanşır Feyziyevə 15-20 cümlə əzbərlətdiriblər, qapı-qapı gəzib, hıqqana-hıqqana təkrarlayır. Onu başa düşmək olar, milyonlar itirib, cızdağı çıxıb, indi bu çıxışlarla üstünə su tökdüyünü güman edir, ancaq yenə şirin-şirin cızıldayır, səsi aydınca eşidilir.
Mingəçevirlilərin günün günortasında çıraqla axtardığı, çırağı sönmüş Aydın Mirzəzadə ştatlı mirzə funksiyasını .....cəsinə (nöqtələrin yerinə nə yazsanız, ana südü kimi halal haqqınızdır) yerinə yetirir. Böhtanın məzmunu eyni, ifaçılar (səsləndirənlər) fərqli ağılın yiyəsi olduqlarından hər kəs gücü çatan qədər irəli- məchul qaranlığa soxulur.
Hikmət Babaoğlunun ruporu özündəndir, sadəcə işə salmaq lazımdır. Mövzunu ver, düyməsini bas, saatlarla alt çənə ilə üst çənə yarışa girsin.
İşə baxın ki, məzmunundan asılı olmayaraq nadir çıxışlarının mahiyyəti "bəçeşm" və "ləbbeyk" olan Vüqar İskəndərovun da dili açılıb. Şəkililərin "karate vüqar" adlandırdığı bu məxluqun tanımadığı-bilmədiyi mövzularda danışmağı eləcə təpik atmağı kimi bir şeydir.
Bilirəm, bu mirzə-natiqlərin ağızlarından çıxardıqları böhtanlara öz qulaqları da inanmır, sadəcə, "boyunlarının borcu" olduğu üçün danışırlar.
Həmişə hər yerdə "Vətən" sözünü böyük hərflə yazmışam. Düşünürəm, indi bu hədyanpərəst həpəndlərin ayaq basdıqları torpağa necə "Vətən" deyim?! Amma...
...mən yenə Vətən sözünü, dırnaqsız-filansız böyük yazıram. Çünki mənim üçün Vətən onun adını həmişə dürüstüyü və təmənnasız sevgisi ilə ucaldan, elmi və əməli ilə dünyada şörhətləndirən, gücü çatdığı qədər bu pisliklərdən arındıran Qubad İbadoğludur.
Ona görə indi daha ürəklə deyirəm:
Canım sənə fəda olsun, Vətən Adam!