Fotoda gördüyünüz şəxs Azərbaycan Ordusunun zabiti Taleh Alcəfərovdur.

N saylı hərbi hissənin tabor komandiridir.
Mayordur.
Qazidir.
Vətən Müharibəsində iştirak edib, şanlı döyüş yolu keçib, medallarla təltif edilib.

Bu günlərdə polis şöbəsində başına gələn hadisəni nəql edir, xahiş edir ki, “Müdafiə Xətti” məsələni diqqətdə saxlasın:
“16 iyul 2024-cü ildə Naftalan şəhərində kafedə hərbçi dostlarımla bir məclisdə toplaşmışdıq. 10 nəfərdən çox hərbçi idik. Kafenin adını dəqiq xatırlamıram. Ya “Fəxrəddin”, ya da “Firuddin” kafesi idi. Məclis bitdi, ayrıldıq. Bir qədər sonra digər hərbçi dostlarımın yaxınlıqdakı mağazanın qarşısında mülki geyimli şəxslər tərəfindən maşına tərəf sıxışdırıldığını gördüm. Onlara tərəf addımladım. Həmin mülki geyimli şəxslər özlərini Naftalan şəhər polis şöbəsinin əməliyyatçıları kimi təqdim etdilər. Heç bir əsas olmadan əməliyyatçılar dostlarıma “Sizi, maşınınızı buralarda ilk dəfədir görürük. Şöbəyə getməli olacağıq”-deyə söylədilər. Biz özümüzü təqdim etsək də faydası olmadı. Şöbədə məni və Ayaz adlı zabit yoldaşımı kabinetlərdə saxladılar, digər 3 hərbçini isə müvəqqəti saxlama yerinə saldılar. Bundan sonra bizimlə son dərəcə kobud və təhqiramiz tonda danışdılar. Söydülər, eyni qaydada da cavab verdim. Özünü Dövran kimi təqim edən polis əməkdaşı çənə nahiyəmə zərbə endirib yerə sərdi. Bir neçə əməliyyatçı da otağa daxil oldu, yerdə məni təpiklədilər, döydülər, xəsarət yetirdilər. Sonradan biləcəkdim ki, Ayaza da fiziki zorakılıqlar göstəriblər. Nə fikirləşdilərsə, bir neçə saat sonra beşimizi də sərbəst buraxdılar. Mən həkimə müraciət etdim, məhkəmə-tibb eksperti müayinə etdi. Bədəmindəki xəsarət izlərini müəyyən etdi. Tezliklə məhkəmə-tibb ekspertizasının rəyi də hazır olacaq. Hadisə yerində və ətrafda müşahidə kameraları var. Şikayətlərimiz düzgün araşdırılsa, müşahidə kameralarının yaddaşına baxılsa, hər şey aydın olar.”

Azərbaycan Ordusunun zabiti, N saylı hərbi hissənin tabor komandiri, mayor rütbəli, Vətən Müharibəsinin iştirakçısı Taleh Alcəfərovun və hərbçi dostlarının Naftalan şəhər polis şöbəsində bir neçə saat saxlanmaları, döyülmələri, təhqir edilmələri barədə məlumat paylaşmışdım.

Əlbəttə, zabitin özünün fikirlərinə əsaslanmışdım.

Bu gün mayor Alcəfərov bu fotonu göndərib, ictimailəşdirilməsini istəyir, qeyd edir ki, "Bizim zabit şərəfimiz təhqir olunub. Ali Baş Komandandan, Baş prokurordan, daxili işlər nazirindən xahiş edirik ki, bu məsələni nəzarətə götürüb, obyektiv araşdırmanın aparılmasına göstəriş versinlər."
Hərbçinin deməsinə görə, sağdakı polis Naftalan şəhər polis şöbəsinin rəis müavini Zamindir. Soyadını bilmir.
Soldakı isə Naftalan RPŞ-nin polis zabiti Ceyhundur. Soyadını bilmir.

Hərbçi göstərir ki, "iyulun 16-da rəis müavini Zaminin xidməti otağında fiziki və psixi zorakılığa məruz qalmışıq. Düzdür, Zamin özü mənə əl qaldırmadı. Amma bütün vəhşiliklər onun gözləri qarşısında oldu. Heç kreslodan ayağa durmadı. Ceyhun və adlarını dəqiqləşdirdiyim digər polis əməkdaşları məni və hərbçi dostlarımı döyüb yerdə sürüdülər."

Mayor Alcəfərov bildirir ki, şöbənin Dövran adında əməliyyat müvəkkili onun üzünə də tüpürüb.

Deməsinə görə, heç demə, həmin Dövran adlı əməkdaş Gəncə şəhər prokurorunun müavininin oğludur.