Qara dənizdə, Rumıniya sahilləri yaxınlığında “Royad Məmmədov” adlı xarici yük gəmisinin dron hücumuna məruz qalması nəticəsində Azərbaycan vətəndaşı həlak olub, daha bir azərbaycanlı isə itkin düşüb.

Azərbaycan Xarici İşlər Nazirliyinin məlumatına görə, hücum zamanı gəminin kapitanı, 1974-cü il təvəllüdlü Rüstəm İsmayıl oğlu Həsənov həyatını itirib.

Gəmi heyətində olan digər Azərbaycan vətəndaşı – 2002-ci il təvəllüdlü Məhəmməd Həmzə oğlu Süleymanzadənin isə itkin düşdüyü bildirilir. Hazırda onun tapılması istiqamətində axtarış tədbirləri davam etdirilir.

Gəmidə olan digər Azərbaycan vətəndaşları xilas ediliblər. Onlardan üç nəfər aldıqları xəsarətlərə görə xəstəxanaya yerləşdirilib.

XİN bildirib ki, Azərbaycanın diplomatik nümayəndəlikləri aidiyyəti ölkələrin səlahiyyətli qurumları ilə koordinasiyalı şəkildə fəaliyyət göstərir. Xəsarət alan vətəndaşlara tibbi və konsulluq yardımının göstərilməsi, həlak olan kapitanın nəşinin Azərbaycana gətirilməsi istiqamətində tədbirlər görülür.

Nazirlik hadisə ilə əlaqədar həlak olan şəxsin ailəsinə və yaxınlarına başsağlığı verib, yaralananlara tezliklə sağalma arzulayıb.

XİN eyni zamanda Azərbaycan vətəndaşlarına hərbi əməliyyatların davam etdiyi və təhlükəsizlik vəziyyətinin qeyri-sabit olduğu ərazilərə səfər etməkdən çəkinməyi tövsiyə edib. Nazirlik riskli marşrutlarda hərəkət edən gəmilərdə və digər nəqliyyat vasitələrində işləməyin də ciddi təhlükə yarada biləcəyini xatırladıb.

“Royad Məmmədov” gəmisinə hücumun kim tərəfindən həyata keçirildiyi və hadisənin digər təfərrüatları barədə hələlik rəsmi məlumat açıqlanmayıb.