Fövqəladə Hallar Nazirliyi elektrik mühərrikli nəqliyyat vasitələrinin şarj edilməsi zamanı təhlükəsizlik qaydalarına ciddi əməl olunması ilə bağlı əhaliyə müraciət edib.

Nazirlik bildirir ki, ölkədə elektrik avtomobillərinin sayının artması ilə yanaşı, elektrikdoldurma qurğularının sayı da sürətlə çoxalır. Lakin bu avadanlıqların düzgün quraşdırılmaması və istismar qaydalarının pozulması yanğın, qısaqapanma və digər təhlükəli hallara səbəb ola bilər.

FHN xüsusilə çoxmənzilli yaşayış binalarının yeraltı avtodayanacaqlarında şarj qurğularının texniki tələblər nəzərə alınmadan quraşdırılmasının ciddi risk yaratdığını vurğulayıb.

Nazirliyin məlumatına görə, elektrik yükünə uyğun olmayan kabel və avadanlıqlardan istifadə, kabellərin düzgün çəkilməməsi, zəruri mühafizə sistemlərinin olmaması və nasaz avadanlıqların istismarı yanğın təhlükəsini əhəmiyyətli dərəcədə artırır.

Elektrikdoldurma qurğularının texniki vəziyyətinə mütəmadi nəzarət edilməməsi, zədələnmiş kabel və portlardan istifadə olunması, nasazlıqların vaxtında aradan qaldırılmaması da təhlükəli hesab olunur.

FHN fiziki və hüquqi şəxsləri, eləcə də elektrik avtomobili sahiblərini şarj qurğularını “Elektrik qurğularının quraşdırılması Qaydaları”na və enerji təchizatı müəssisəsinin təsdiqlədiyi texniki şərtlərə uyğun quraşdırmağa çağırıb.

Nazirlik xəbərdarlıq edir ki, cihazda, kabeldə və ya şarj portunda zədə olduqda, yanmış izolyasiya qoxusu, tüstü və ya qeyri-adi səs müşahidə edilərsə, avadanlıqdan istifadə dərhal dayandırılmalıdır.

Həmçinin izolyasiyası zədələnmiş, ucları açıq olan kabellərdən istifadə etmək, onları gərginlik altında saxlamaq və qidalanma kabelinə əlavə qoşmalar etmək yolverilməz hesab olunur.