Avropa Şurası Parlament Assambleyası (AŞPA) Beynəlxalq Cinayət Məhkəməsinin (BCM) hakim və prokurorlarına qarşı təzyiq və hədələri pisləyən qətnaməni yekdilliklə qəbul edib.

Strasburqda keçirilən plenar iclasda qəbul olunan sənəd Niderlanddan olan deputat Tekke Panmanın hazırladığı hesabat əsasında müzakirəyə çıxarılıb. AŞPA beynəlxalq cinayət ədaləti sistemində öz vəzifələrini yerinə yetirən hakim və prokurorlara qarşı məcburedici tədbirlərin onların müstəqilliyinə qəbuledilməz müdaxilə olduğunu bildirib.

Qətnamədə xüsusilə ABŞ və Rusiyanın BCM hakimləri və prokurorlarına qarşı atdığı addımlara diqqət çəkilib. Söhbət Ukrayna, Əfqanıstan və Fələstində törədildiyi iddia olunan müharibə cinayətləri və insanlığa qarşı cinayətlərlə bağlı araşdırmalarda iştirak edən məhkəmə rəsmilərinə qarşı tətbiq olunan tədbirlərdən gedir.

AŞPA hesab edir ki, bu cür təzyiqlər yalnız ayrı-ayrı hakim və prokurorların peşə və şəxsi həyatına təsir göstərmir, həm də Beynəlxalq Cinayət Məhkəməsinin normal fəaliyyətinə ciddi maneələr yaradır.

Assambleya BCM-in fəaliyyətinə tam dəstəyini ifadə edərək beynəlxalq ictimaiyyəti, xüsusilə Roma Statutuna qoşulmuş dövlətləri məhkəməni və onun əməkdaşlarını xarici təzyiqlərdən qorumağa çağırıb.

Müzakirələrdə çıxış edən Beynəlxalq Cinayət Məhkəməsinin birinci vitse-prezidenti Rosario Salvatore Aitala bildirib ki, məhkəməyə hücumların səbəbi onun dövlət və siyasi rəhbərlərin hərəkətlərinə görə məsuliyyət məsələsini gündəmə gətirməsidir.

Aitala vurğulayıb ki, siyasi və hərbi güc şəxsləri hüquqi məsuliyyətdən azad etmir və müharibə şəraitində belə fundamental hüquqi və mənəvi prinsiplərə əməl olunmalıdır.

AŞPA, həmçinin Avropa Şurasına üzv dövlətləri və Avropa İttifaqını BCM və Avropada yerləşən digər beynəlxalq təşkilatların bank, sığorta, tibbi və informasiya texnologiyaları xidmətlərinə maneəsiz çıxışını təmin etməyə çağırıb.

Qətnamədə Avropa İttifaqının “Blocking Statute” mexanizminin və buna bənzər milli hüquqi vasitələrin tətbiqinin mümkünlüyü də qeyd olunub. Məqsəd xarici sanksiya və digər məcburedici tədbirlərin BCM-in fəaliyyətinə təsirinin qarşısını almaqdır.

Assambleya Roma Statutuna tərəf olmayan dövlətləri də Beynəlxalq Cinayət Məhkəməsinin mandatına, bütövlüyünə və müstəqilliyinə hörmət etməyə, onun hakim və prokurorlarına qarşı sanksiya və digər təzyiq vasitələrindən istifadə etməməyə çağırıb.

AŞPA-nın “Beynəlxalq Cinayət Məhkəməsinə təhdidlər” mövzusunda hesabatı 2026-cı il payız sessiyasının əsas hüquqi və insan hüquqları mövzularından biri kimi gündəliyə daxil edilmişdi.