Gənc fəal Cəlal Cavadova 30 sutka həbs cəzası verilib.

Bu barədə Nəsimi Rayon Məhkəməsi yanvarın 31-də qərar çıxarıb.

O, İnzibati Xətalar Məcəlləsinin 206-cı (şəxsi istehlak miqdarında narkotik əldə etmə, daşıma, saxlama) maddəsi ilə ittiham olunub.

Yaxınları isə ittihamı qəbul etmir, onun seçki məntəqələrindən birində qutuya Meydan TV-nin həbsdə olan əməkdaşlarının fotosunu atmasına görə cəzalandırıldığını deyirlər.


Gənc fəal hara yoxa çıxıb?

Dünən itkin düşmüş fəal Cəlal Cavadov haqqında 20 saatdan çoxdur məlumat yoxdur. Vəkili Zibeydə Sadıqova DİN-dən Cavadovun saxlanılıb-saxlanılmadığı haqqında məlumat ala bilmir. DİN Turan agentliyinin sorğusuna da cavab verməyib.

Öz növbəsində, fəalın anası oğlunun axtarışında kömək etmək xahişi ilə ombudsmana müraciət edib.

Xatırladaq ki, yanvarın 30-da sosial şəbəkələrdə yanvarın 29-da bələdiyyə seçkiləri zamanı seçki qutusuna Meydan TV-nin həbs edilmiş jurnalistlərinin fotoşəkillərini məhz Cəlal Cavadovun atdığı haqqında məlumat yayılıb. Daha sonra o, bunun şəklini çəkib və sosial şəbəkələrdə dərc edib.

Yanvarın 30-da saat 16 radələrində onunla əlaqə kəsilib. Qeyri-rəsmi məlumatlara görə, onu polis saxlayıb.


Fəal Cəlal Cavadov saxlanılıb

Fəal Cəlal Cavadov saxlanılıb. Onunla saat 16.00-dan əlaqə kəsilib.

Dostları hesab edir ki, Cavadov , yamvarın 29-da bələdiyyə seçkilərində keçirdiyi etiraz aksiyasına görə saxlanılıb.

Cavadov seçki məntəqələrinin birində Meydan Tv-nin həbsdə olan jurnalistlərinin fotolarının əks olunduğu plakatı seçki qutusuna yerləşdirib.

Məsələ ilə bağlı Daxili İşlər Nazirliyi ilə əlaqə saxlamaq mümkün olmayıb.

Nurlan Libre