“Azel” TV saytının rəhbəri, Azərbaycana ekstradisiya məqsədilə Gürcüstanda həbs olunmuş Əfqan Sadıqov fevralın 2-dən quru aclığa başlayıb. Bu barədə Turan-a onun xanımı Sevinc Sadıqova bildirib. Fevralın 2-də o, Əfqan Sadıqov ilə telefonla danışıb.

136 sutkadır aclıq edən əfqan Sadıqov fevralın 2-dən su və dərman qəbulundan imtina edib. Xanımı ondan quru aclıqdan imtina etməsini xahiş edib. "Ancaq Əfqan dedi ki, quru aclığı axıradək davam etdirəcək. Onun sağlamlıq durumu çox ağırdır. Quru aclığa keçəndə 42 kiloqram çəki itirib”, - Sadıqova deyib.

“Əfqan siyasi sifarişlə həbs edilib. Gürcüstan hakimiyyəti Bakının sifarişini icra edir. Yanvarın 31-də onu sübh tezdən aparıblar məhkəməyə, məhkəmə saat 15:00-da başlayıb. Bu, Gürcüstan hakimiyyətinin ona qarşı münasibətini bir daha nümayiş etdirib. 130 gündən çox aclıq edən adama əziyyət vermək olarmı. Əfqan təcridxanadan kitab istəyib, verməyiblər ki, Azərbaycan dilində kitab yoxdur. Vəkili Azərbaycan dilində kitab aparıb, o kitabı da vermirlər”, - Sadıqova deyib.

Hazırda Sadıqova üç uşaqla birlikdə üçüncü ölkədədir və orada Gürcüstan səfirliyinin qarşısında aksiya keçirmək niyyətindədir.

Qeyd edək ki, Əfqan Sadıqov təqiblərdən ehtiyat edərək 2023-cü ilin dekabrında ailəsilə birlikdə Gürcüstana gedib. İyulda onu Gürcüstandan Türkiyəyə buraxmayıblar və deyiblər ki, ancaq Azərbaycana qayıda bilər.

Avqustda Azərbaycanın sorğusu əsasında Sadıqov həbs edilib. Bakıda onu hədə yoluyla tələb etməkdə ittiham edirlər və ekstradisiyasını tələb edirlər. Həbs olunmasına və ona sığınacaq verilməsindən imtina edilməsinə etiraz edərək sentyabrın 21-dən aclıq edir. Gürcüstan hakimiyyəti Əfqan Sadıqova siyasi sığınacaq verməkdən imtina edib.

Noyabrın 28-də Tbilisi Şəhər Məhkəməsi Sadıqovun Azərbaycana ekstradisiyası barədə qərar qəbul edib. Yanvarın 15-də Tbilisi Apellyasiya Məhkəməsi bu qərarı təsdiqləyib. Yanvarın 31-də Tbilisi məhkəməsi Əfqan Sadıqovun həbs müddətini daha üç ay uzadıb.