Mənzil İnşaatı Dövlət Agentliyinin (MİDA) “Güzəştli mənzil” informasiya sisteminə qarşı həyata keçirilən kiberhücum cəhdləri ilə bağlı cinayət işi başlanılıb.

Bu barədə Dövlət Təhlükəsizliyi Xidməti (DTX) məlumat yayıb.

Məlumata görə, MİDA-nın növbəti layihələri üzrə bu il dekabrın 3-də ümumilikdə 627 mənzilin “Elektron hökumət” portalı (www.e-gov.az) üzərindən satışı zamanı Dövlət Təhlükəsizliyi Xidməti, Xüsusi Rabitə və İnformasiya Təhlükəsizliyi Dövlət Xidməti və MİDA tərəfindən tətbiq edilən informasiya təhlükəsizliyi mexanizmləri vasitəsilə sistemin təhlükəsiz fəaliyyəti təmin edilib.

Mənzil seçimi prosesinə nəzarət zamanı müxtəlif kiberhücum cəhdləri qeydə alınıb, həmin cəhdlər operativ şəkildə aşkarlanaraq zərərsizləşdirilib.

Araşdırmalar zamanı müəyyən edilib ki, Azərbaycan Respublikasının vətəndaşları C. Süleymanlı və T. Abdulov onlara müraciət etmiş şəxslərin güzəştli şərtlərlə mənzil əldə etmə prosesini sürətləndirmək və onlara qanunsuz üstünlük qazandırmaq məqsədilə əvvəlcədən əldə etdikləri və xüsusi texniki imkanlarla uyğunlaşdırdıqları proqram təminatından istifadə ediblər. Həmin proqram təminatı MİDA-nın “Güzəştli mənzil” sistemində mənzil seçimini təmin edən istifadəçi səhifəsinə və inteqrasiya edilmiş mühafizə mexanizmlərinə qanunsuz şəkildə tətbiq olunub.

DTX-nin məlumatına görə, bu hərəkətlər dekabrın 3-də saat 11:00-da kompüter infrastrukturunun normal fəaliyyətinə qəsdən ciddi maneə yaratmağa yönəlib.

Qeyd olunan şəxslər Cinayət Məcəlləsinin 273.3.1 və 273.3.2-ci maddələri (kompüter sisteminə qanunsuz müdaxilə və sistemin fəaliyyətinə təkrar qəsdən maneə törətmə) ilə cinayət məsuliyyətinə cəlb ediliblər.

Hazırda faktla bağlı istintaq-əməliyyat tədbirləri davam etdirilir.