Artıq məmləkətimiz elə bir dönəmə gəlib ki, hüquq və ədalət tanımayan sistem hər kəsin qapısını döyür. Hər zaman müsahibələrimdə, açıqlamalarımda bildirirdim ki, susmaq və seyirci qalmağınız sizi hüquq və ədalət tanımayan sistemdən qorumur.

Bir ildir Kürdəxanı İstintaq Təcridxanasındayam. Təcridxanada kifayət qədər siyasi proseslərdən uzaq olub, amma hüquqsuzluğun və ədalətsizliyin qurbanı olan şəxslər var.
İmam Əlinin gözəl bir sözü var: "Dövlətin dini onun ədalətindədir".

Əgər məmləkətdə ədalət yoxdursa, hamsı fundamental haqlardan danışmaq olar?!

Haqqımda irəli sürülən əsassız ittihamlar üzrə istintaq artıq yekunlaşmaq üzrədir. Hər kəsə aydındır ki, haqqımda irəli sürülən qanunsuz və əsassız ittihamlar siyasi fəaliyyətimə görədir. Ölkədəki mövcud siyasi sistem, hüququn bir mərkəzdən idarə olunduğu hər birimizə məlumdur.

İstintaq dönəmində də haqqımda ifadə verən şəxslər heç nədən utanmayın və sıxılmayın. Doğru olanı etmisiniz, mövcud siyasi vəziyyəti çox yaxşı anlayıram. Nə istintaqı aparan müstəntiqlərə, nə də ki, bir il ərzində çıxdığım məhkəmələrdə haqqımda əsassız qərarlar verən hakimlərə heç bir nifrətim yoxdur. Onlar da hüquq və ədalət tanımayan sistemin qurbanlarıdır.

Son bir ildə hakimiyyətin yandaş mediası haqqımda ağıllarına yox, ağızlarına nə gəldi yazdılar və dedilər. Amma vətənpərvərlik dərsi keçəndə heç olmasa özünüzün də bu məmləkət üçün etdiklərinə baxın, mənim də!

Bütün bunlara baxmayaraq sizə də bir kinim, nifrətim yoxdur. Mənim üçün ifadə azadlığı qutsaldır. Baxmayaraq ki siz ifadə azadlığından istifadə edəndə jurnalistika etik kondekslərini ayaq altına atırsınız.

Siyasi fəaliyyətim zamanı hər zaman kin və nifrətdən uzaq durmağı təbliğ etmişəm. Əsassız olaraq həbsə atılmam belə kin və nifrətə əl atmağımıza əsas olmamalıdır. Biz mübarizə apardığımız sistemə bənzəməməliyik. Ümidsiz və inamsız olmayın, məmləkətimizdə mütləq azadlıq günəşi doğacaq.

İstər iqtidarda istər müxalifətdə olan siyasətçilər xalq qarşısındakı məsuliyyətini anlamalıdır. Gündəlik və ya şəxsi maraqlar üçün millətin gələcəyini qaranlığa qərq etməməlidilər.

Unutmayın, sevgi və həqiqət, nifrət və yalan üzərində qalib gələcək!

Ruslan İzzətli
Kürdəxanı İstintaq Təcridxanası