Həbsdə olan “Arqument.az” saytının baş redaktoru Şəmşad Ağa fevralın 11-də “APA”da haqqında gedən məqaləyə cavab verib. “Meydan TV”də dərc olunan yazıda Şəmşad Ağa sözügedən məqalədəki itthamları “iftira” adlandırır.

Jurnalist “APA”nın onu “Meydan TV”in yeni rəhbəri kimi təqdim etməsinə cavab olaraq bildirir ki, “bu qədər absurd və gülünc iddialar yalnız Azərbaycanda uydurula bilər”.
Şəmşad Ağa məqalədə gedən, onun Avropada yaşayan azərbaycanlı jurnalistlərlə çəkdirdiyi fotolara istinad edərək deyir ki, bunlar ona qarşı ittihamlar üçün sübut ola bilməz. “3 il öncə xaricdə təlimdə olmuşam. Hökumət mediasının yaydığı və fakt kimi sırıdığı fotolar da həmin təlimdəndir. Həmin fotoların bəzilərini də öz sosial media hesabımdan da paylaşmışam. Bunlar sanki “Amerikanı yenidən kəşf ediblər””, - deyə o qeyd edib.

O əlavə edib ki, azadlıqda ikən həbsdə olan jurnalistlərə dəstək olmağı özü üçün “vicdan məsələsi” hesab edib. “Meydan TV-nin əməkdaşları həbs edildikdən sonra onlara açıq dəstək vermişəm, hüquqlarını müdafiə etmişəm. Bu yazılar da rəhbəri olduğum “Arqument.az” saytında dərc olunub. Həm “toplumçular”, həm “abzasçılar”, həm də “meydançılar” bu ölkənin, xalqın haqq səsidirlər, onlara dəstək olmaq vicdan məsələsidir”, - o bildirib.

Şəmşad Ağa günahsız olduğunu və peşə fəaliyyətinə görə həbs olunduğunu təkrar edib. “Həbsimiz və bu sistematik repressiya dalğası siyasi qərardır. Heç bir yalan və manipulyasiya bu həbslərin siyasi motivini dəyişdirə bilməz. İfadə azadlığı müqəddəsdir və qalib gələcək! Bütün günahsız dostlarıma və həmkarlarıma azadlıq tələb edirəm!”, - deyə o müraciətinin sonunda qeyd edib.

Fevralın 6-da Xətai Rayon Məhkəməsində "Meydan TV işi" üzrə həbs olunan jurnalist Şəmşad Ağa barəsində 2 ay 1 gün müddətinə həbs qətimkan tədbiri seçilib. Jurnalist Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham olunur.
O, fevralın 5-də gecə 2 radələrində polis tərəfindən saxlanılıb, elə həmin gün onun evində axtarış aparılıb. Axtarış nəticəsində jurnalistin telefonları, kompüteri, jurnalist vəsiqəsi, yaddaş kartları götürülüb.

Ötən il iyulun 5-də "Arqument.az" xəbər saytının rəhbəri Şəmşad Ağa Bakı Şəhər Baş Polis İdarəsində "Toplum TV işi" üzrə şahid qismində dindirilib. Şəmşad Ağa "Toplum TV"də yayımlanan "Debat" verilişinin aparıcısı olub. İstintaq orqanı şifahi şəkildə onun ölkədən çıxışına qadağa qoyulduğunu bildirib.