Milli Şura Koordinasiya Mərkəzinin üzvü Tofiq Yaqublunun həbsi ilə bağlı Milli Şuranın bəyanatı

10 mart 2025-ci il tarixində Azərbaycan Respublikası Prezident Administrasiyasının, şəxsən İlham Əliyevin sifarişi əsasında Bakı Ağır Cinayətlər Məhkəməsində səhnələşdirilən növbəti bir siyasi-hüquqi fars öz gözlənilən sonluğuna çatdı: Milli Şura Koordinasiya Mərkəzinin üzvü, Qarabağ Savaşı qəhrəmanı, ölkənin ən prinsipial və dürüst müxalifətçilərindən biri, dəfələrlə vicdan məhbusu olmuş Tofiq Yaqublu yenidən şərlənərək 9 il müddətinə həbs edildi.

Aylarla sürən məhkəmə istintaqı zamanı Tofiq Yaqublu və vəkilləri ona qarşı irəli sürülmüş ittihamı darmadağın etdilər. Proses müddətində nəinki Tofiq bəyin heç bir cinayət törətmədiyi, əksinə hüquq-mühafizə orqanları əməkdaşlarının öncədən mütəşəkkil dəstə yaradaraq ona qarşı cinayət törətdiyi sübuta yetirildi. Hətta hakim ailəyə məxsus mobil şəbəkənin anten məlumatları belə Tofiq Yaqublunun istintaqın improvizə etdiyi cinayətin törədildiyi vaxt hadisə yerindən on kilometrlərlə uzaqda olduğunu təsdiq etdi. Tofiq Yaqublunun təqsirsizliyini ortaya çıxaran çoxsaylı sübutlara baxmayaraq Tofiq Yaqublunun dələduzluq cinayətində təqsirli bilinərək uzunmüddətli həbsə göndərilməsininin Azərbaycan hakimiyyətinin onun prinsipial, ardıcıl, vicdanlı mübarizəsinə qarşı qisasçılıq və şəxsi düşmənçiliyindən başqa izahı ola bilməz.

Tofiq Yaqublunun həbsi ölkədə siyasi müstəvinin tamamən sıradan çıxarılması, söz azadlığının məhv edilməsi, sərbəst toplaşma azadlığının qadağan edilməsi, azad sözə və siyasi fəaliyyətə qarşı qəddar və sistematik basqılar fonunda gerçəkləşir.

Hazırda Azərbaycan 350-dən çox siyasi məhbusu ilə bütün Avropa məkanının Belarusdan sonra ikinci repressiya çempoinudur. 38 nəfər jurnalist, onlarla siyasi fəal həbsdədir. "Abzas Media", "Toplum TV,, "Meydan TV" kimi müstəqil media qurumlarının kollektivi kütləvi şəkildə həbsə atılıb, ölkədə çalışan beynəlxalq media, hətta tərəfsiz BMT qurumlarının fəaliyyətinə son verilir, son günlər AXCP fəallarına qarşı yeni repressiya dalğası vüsət alıb.

Bütün bunlar Azərbaycan hakimiyyətinin ölkəmizi sərt avtoritarizm standartlarından diktatura buxovlarına keçirməsinə dəlalət edən qorxunc və təkzibedilməz faktlardır.

Tofiq Yaqublu kimi xalq tərəfindən sevilən vicdanlı, əqidəli, cəsur və şəffaf bir siyasi liderin ən formal əsas belə olmadan saxta, uydurulmuş, əsassız bəhanələrlə siyasi motivli həbsi, əslində, elə topluma meydan oxumaqdır.

Azərbaycan xalqı onunla belə saymazyana davranan, onun haqları üçün savaşan qəhrəman, cəsur, fədakar insanları mənəvi və fiziki işgəncələrə məruz qoyan, onların azadlığına və həyatına qəsd edən rejimə "dur" demək üçün özündə güc və iradə tapmalıdır.

Milli Şura olaraq Tofiq Yabublunun qanunsuz, əsassız, siyasi sifarişli həbsini qətiyyətlə pisləyir, beynəlxalq təşkilatlardan Azərbaycanda həyata keçirilən ağır repressiyalara, insan hüquqları və demokratiyanın son işartılarının da söndürülməsinə biganə qalmamağı, bu yöndə təsirli əməli addımlar atmağı tələb edirik.