Azərbaycan parlamentinin fəaliyyətini izləyən və ictimai müzakirələr təşkil edən “Məclis info” platformasının üzvləri — İmran Əliyev və Elgiz Qəhrəman — barəsində açılmış cinayət işi üzrə məhkəmə prosesi başlayır. Bu barədə “Abzas Media”ya məlumatı onların yaxınları verib. Bildirilib ki, iş Bakı Ağır Cinayətlər Məhkəməsinin hakimi Roman Ələkbərlinin icraatına verilib.

“Məclis info” platforması 2020-ci ildə yaradılıb və fəaliyyət dövründə parlamentdəki prosesləri izləyib, ictimaiyyətə informativ məzmun təqdim edib. Platforma həmçinin millət vəkilləri ilə aktual mövzularda müzakirələr təşkil edib.

2023-cü ilin aprelində platforma ilə bağlı cinayət işinin başlanmasından az sonra İmran Əliyev Heydər Əliyev adına Beynəlxalq Hava Limanında saxlanılıb və Dövlət Sərhəd Xidmətinin əməkdaşları tərəfindən polisə təhvil verilib. Ona qarşı əvvəlcə qaçaqmalçılıqla bağlı (Cinayət Məcəlləsinin 206.3.1 və 206.3.2-ci maddələri) ittihamlar irəli sürülüb. Daha sonra isə bu ittihamların sayı artırılaraq, 8 maddə ilə ittiham olunub. Bu maddələr əsasən maliyyə pozuntuları və vəzifə səlahiyyətlərinin aşılmasına aiddir və 12 ilədək azadlıqdan məhrumetmə cəzasını nəzərdə tutur.

İctimai fəal Elgiz Qəhrəman isə 2024-cü ilin fevralında təqsirləndirilən şəxs qismində istintaqa cəlb olunub. Onun barəsində polis nəzarətinə verilməklə qətimkan tədbiri seçilib. Qəhrəman 2016-cı ildə də narkotik ittihamı ilə həbs olunmuş və hüquq müdafiəçiləri tərəfindən siyasi məhbus kimi tanınmışdı.

Həm yerli, həm də beynəlxalq hüquq müdafiə təşkilatları bu cinayət işinin siyasi sifariş əsasında açıldığını hesab edir. Məhkəmə prosesinin ədalətli və şəffaf keçib-keçməyəcəyi isə yaxın günlərdə bəlli olacaq.