USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
ABŞ-da Apellyasiya Məhkəməsi “Azadlıq Radiosu” və “Amerikanın Səsi”nin İşlərinə Maneə Yaratdı
ABŞ-ın paytaxtı Vaşinqtonda apellyasiya məhkəməsi “Azadlıq Radiosu” və “Amerikanın Səsi” media orqanları ilə bağlı aşağı instansiya məhkəmələrinin qərarlarını dayandırıb.
Mayın 1-də Kolumbiya Dairə Məhkəməsinin hakimi “Azadlıq Radiosu” ilə bağlı aşağı instansiya məhkəməsinin çıxardığı qərarın icrasını saxlayıb. Həmin qərarda hakim Roys Lambert Konqresin bu media qurumuna ayırdığı maliyyə vəsaitinin bir hissəsinin ödənilməsinə göstəriş vermişdi. Apellyasiya məhkəməsi bu addımını dövlət tərəfinin vəsatətlərini dinləmək üçün vaxt tanınması ilə əsaslandırıb. Əgər bu qərardan apellyasiya şikayəti verilərsə, işə geniş tərkibdə hakimlər heyəti baxacaq.
“Azadlıq Radiosu” mayın 4-də yaydığı açıqlamada bildirib ki, maliyyə çətinlikləri səbəbilə onlarla işçi məzuniyyətə göndərilib, frilanserlərlə bağlanmış müqavilələr ləğv olunub və digər qənaət tədbirləri görülüb.
Digər bir qərar isə mayın 3-də “Amerikanın Səsi” ilə bağlı verilib. Məhkəmə aşağı instansiyanın bu media qurumunun fəaliyyətini davam etdirməsinə imkan verən qərarını da dayandırıb. Halbuki, ABŞ Qlobal Media Agentliyi bundan bir gün əvvəl – mayın 2-də məzuniyyətdə olan əməkdaşlara mayın 5-dən işə qayıda biləcəklərini bildirmişdi. Məhkəmənin son qərarı isə bu əməkdaşların taleyini qeyri-müəyyən vəziyyətə salıb.
Qeyd edək ki, ABŞ Prezidenti Donald Tramp martın 14-də imzaladığı icra sərəncamı ilə “Azadlıq Radiosu”, “Amerikanın Səsi” və onlara nəzarət edən ABŞ Qlobal Media Agentliyi (USAGM) də daxil olmaqla, yeddi federal agentliyin ixtisarı istiqamətində addımlar atmışdı.
Bu qərarlar ABŞ-ın beynəlxalq yayım siyasətində ciddi dəyişikliklərin baş verə biləcəyinə işarə edir.
