Mayın 10-da müasir Azərbaycanın banisi, ümummilli lider Heydər Əliyevin anadan olmasının 102-ci ildönümüdür. Hər il olduğu kimi, bu gün də ölkə daxilində və xaricində müxtəlif səviyyələrdə anım tədbirləri keçirilir.

Heydər Əliyev Azərbaycan siyasətində mühüm iz qoymuş şəxsiyyətlərdəndir. Onun fəaliyyətinə münasibət cəmiyyətdə müxtəlif mövqelərdən qiymətləndirilir. Bir qisim insanlar onu Azərbaycanın müstəqilliyini qoruyub saxlamaqda və dövlətçiliyin təməllərini möhkəmləndirməkdə misilsiz rol oynamış lider kimi görür. Digərləri isə onun avtoritar idarəetmə üsulunu və siyasi opponentlərə qarşı sərt münasibətini tənqid edirlər.

Təhlilçilər bildirirlər ki, uzun illər ölkə rəhbəri olmuş bir şəxsiyyətin fəaliyyətinə yalnız tərif və ya yalnız tənqid prizmasından baxmaq obyektiv yanaşma sayıla bilməz. Müxtəlif dövrlərdə verilmiş qərarlar, görülmüş işlər və buraxılmış səhvlər kompleks şəkildə araşdırılmalı və qiymətləndirilməlidir.

Ulu Öndər Heydər Əliyevin Azərbaycan tarixindəki rolu, siyasi irsi və onun formalaşdırdığı idarəçilik modeli bu gün də geniş müzakirə olunur. Bəzi siyasətçilər, o cümlədən müxalifət nümayəndələri belə, Heydər Əliyevin müəyyən dövrlərdəki mövqelərini və siyasi addımlarını etirafla xatırlayırlar. Məsələn, AXCP sədri Əli Kərimli bir müsahibəsində onun hakimiyyəti dövründə ölkədə müəyyən dərəcədə “yarımdemokratiya” olduğunu bildirmişdi.

Heydər Əliyevin doğum günü münasibətilə onun xatirəsini ehtiramla anır, Allahdan rəhmət diləyirik.

Ruhu şad olsun.