“İşçi Masası” Həmkarlar İttifaqları Konfederasiyasının üzvü, siyasi fəal Elvin Mustafayevin taleyi ilə bağlı narahatlıq artır. Yaxınları və hüquq müdafiəçiləri onun saxlanıldığı yerdən və səhhətindən xəbər ala bilmədiklərini bildirirlər. Bu barədə mayın 14-də “İşçi Masası” rəsmi məlumat yayıb.

Məlumata görə, Elvin Mustafayev 3 saylı Cəzaçəkmə Müəssisəsində saxlanıldığı müddətdə məhbusların hüquqlarının pozulmasına etiraz olaraq mayın 6-da aclıq aksiyasına başlayıb. O, eyni zamanda Azərbaycanda siyasi məhbusların azadlığa buraxılmasını tələb edib. Aksiyadan dərhal sonra ona təzyiqlər edildiyi və cəzaçəkmə müəssisəsinin dəyişdirildiyi bildirilir. Lakin “İşçi Masası” və Mustafayevin ailəsi hazırda onun hansı müəssisədə saxlanıldığını bilmədiklərini qeyd edir.

“Sonuncu dəfə Elvinlə mayın 6-da əlaqə saxlamışıq. Həmin gündən sonra ondan heç bir xəbər almamışıq. Cəzaçəkmə müəssisəsinə etdiyimiz müraciətlərə cavab verilmir. Onun başına nə gəldiyini bilmirik. Aclıq aksiyasına görə səhhətində ciddi problemlər ola bilər,” – deyə yaxınları bildiriblər.

Məsələ ilə bağlı Penitensiar Xidmət və digər rəsmi dövlət qurumlarından hər hansı bir açıqlama verilməyib. Hüquq müdafiəçiləri və vətəndaş cəmiyyəti fəalları isə bu məsələ ilə bağlı təcili və şəffaf araşdırma aparılmasına çağırır.

Elvin Mustafayev 2023-cü ilin avqustunda narkotik maddələrin qanunsuz dövriyyəsində ittiham olunaraq həbs edilmişdi. 2024-cü il yanvarın 31-də Bakı Ağır Cinayətlər Məhkəməsi onu 3 il müddətinə azadlıqdan məhrum edib. Lakin Mustafayev özünü təqsirli bilməyib və irəli sürülən ittihamların əsassız olduğunu, həbsinin “İşçi Masası”ndakı ictimai-sosial fəaliyyətinə görə həyata keçirildiyini bildirib.

“İşçi Masası” rəhbərliyi Elvin Mustafayevin siyasi fəallığına görə cəzalandırıldığını qeyd edərək onun dərhal azad edilməsini tələb edir.

Hazırda hüquq müdafiəçiləri beynəlxalq təşkilatlara müraciət etməyə hazırlaşır. Onlar həm Mustafayevin səhhəti, həm də onunla əlaqənin tamamilə kəsilməsi ilə bağlı ciddi narahatlıqlarını ifadə edirlər.

Mövzu ilə bağlı yeni məlumat olduqda xəbər yenilənəcək.