15 saylı cəzaçəkmə müəssisəsində cəza çəkən “xeberman.com” saytının rəhbəri Polad Aslanov bu cəzaçəkmə müəssisəsində məhbusların hüquqlarının pozulması faktlarını ictimailəşdirdikdən sonra rəhbərlik tərəfindən təhdid olunduğunu bildirib. Bu barədə Turan-a onun həyat yoldaşı Gülmirə Aslanova bildirib.

"Bu gün Polad zəng etdi və dedi ki, cəzaçəkmə müəssisəsinin rəisi Rəşad Əhədov məhbusların hüquqlarının pozulduğu haqqında mətbuata məlumat verdiyinə görə onu təhdid edib. O, Polad bir daha belə etsə, onu yaxınları ilə telefon söhbətlərindən və görüşlərdən məhrum edəcəyi, karserə salacağı ilə hədələyib", deyə həyat yoldaşı bildirib.

O, həmçinin cəzaçəkmə müəssisəsindəki məhbuslara Poladla ünsiyyət saxlamamaları üçün təzyiq göstərildiyini deyib. "Polad Avropa İnsan Hüquqları Məhkəməsinə müraciət etmək qaydasını izah etdiyinə görə bir məhbusu karserə salıblar.

Bir müddət əvvəl Polad Aslanov evə cəzaçəkmə müəssisəsinin rəis müavininin kabinetindən zəng etməyə məcbur edildiyini və söhbətinə nəzarət olduğunu bildirmişdi. Eyni zamanda o, 15 saylı cəzaçəkmə müəssisəsində saxlanma şəraitinin pis olduğunu, məhbusların hüquqlarının pozulduğunu demişdi. Eyni cəzaçəkmə müəssisəsində saxlanılan bloger Rəşad Ramazanov da bu haqda məlumat vermişdi.

Penitensiar Xidmətdən bu məsələ ilə bağlı şərh almaq mümkün olmayıb.

Qeyd edək ki, Polad Aslanov 12 iyun 2019-cu il tarixində İranın xeyrinə casusluq ittihamı ilə - CM-in 274-cü (dövlətə xəyanət) maddəsi ilə həbs edilib. O, 16 il azadlıqdan məhrumetmə cəzasına məhkum edilib.

Aslanov bütün ittihamları rədd edir, xüsusi xidmət əməkdaşları arasında korrupsiya faktlarını ifşa etdiyinə görə təqib edildiyini bildirir.

Hüquq müdafiəçiləri onu siyasi məhbus kimi tanıyıblar. Sonradan Ali Məhkəmə Aslanovun həbs müddətini 13 ilə qədər azaldıb. AİHM onun həbsinin qanunsuz olduğunu təsdiq edib və təzminat təyin edib.