Media hüququ üzrə tanınmış ekspert və Toplum TV-nin həmtəsisçisi Ələsgər Məmmədli artıq ikinci doğum gününü azadlıqdan məhrum şəraitdə qeyd edir. O, bu gün – 24 may 2025-ci ildə 57 yaşını həbsxanada qarşılayır.

Ələsgər Məmmədli 2024-cü il martın 8-də Bakıda saxlanılıb. Ona qarşı irəli sürülən ittihamlar sırasında valyuta qaçaqmalçılığı, qanunsuz sahibkarlıq, vergidən yayınma və çirkli pulların yuyulması kimi ağır maliyyə cinayətləri yer alır. Lakin Məmmədli bu ittihamları rədd edir və həbsi siyasi motivli hesab edir.

Ailəsi və vəkilləri onun səhhətindəki problemlərlə bağlı narahatlıqlarını dəfələrlə ictimailəşdiriblər. Onun həbsindən əvvəl qalxanabənzər vəzində şiş aşkarlandığı, amma lazımi tibbi yardım ala bilmədiyi bildirilir. Ələsgər Məmmədli məhkəmədə deyib ki, həbsdə olduğu müddətdə müayinələr formal xarakter daşıyıb və həkimlər əməliyyat üçün sənəd verməyə cəsarət etmirlər.

Onun vəkili dəfələrlə ev dustaqlığına buraxılması üçün məhkəməyə vəsatət versə də, bu müraciətlərin heç biri təmin olunmayıb.

Ələsgər Məmmədlinin saxlanılması və haqqında cinayət işinin açılması beynəlxalq narahatlıq doğurub. Amnesty International və Human Rights Watch kimi nüfuzlu insan hüquqları təşkilatları Məmmədli və digər saxlanılan jurnalistlərin dərhal azadlığa buraxılmasını tələb ediblər. Onlar bu həbsləri Azərbaycanda müstəqil medianın boğulması kampaniyasının bir hissəsi kimi dəyərləndirirlər.

1968-ci il mayın 24-də Ağdam rayonunun Quzanlı kəndində anadan olan Ələsgər Məmmədli İstanbul Universitetinin Hüquq fakültəsini, daha sonra Ankara Universitetində magistr təhsilini başa vurub. O, uzun illər media və hüquq sahəsində fəaliyyət göstərib, beynəlxalq təşkilatlarla əməkdaşlıq edib və yüzlərlə hüquqi təlimin müəllifi olub.

Toplum TV-yə qarşı təzyiqlər 2024-cü il martın 6-da ofisdə keçirilən polis reydi ilə başlayıb. Bu iş üzrə ümumilikdə 10 nəfərə cinayət işi açılıb. Onların arasında jurnalistlər və ictimai fəallar da var.

Ələsgər Məmmədli və həmkarlarının həbsi Azərbaycanda söz və media azadlığına qarşı artan təzyiqlərin simvoluna çevrilib.