Fransa Prezidenti Emmanuel Makronun Vyetnama rəsmi səfəri zamanı maraqlı və bir qədər də qeyri-adi hadisə baş verib. Səfər zamanı həyat yoldaşı Bricit Makronun davranışı sosial şəbəkələrdə və mediada geniş müzakirələrə səbəb olub.

Hadisə Hanoi Hava Limanında baş verib. Prezident təyyarədən enməyə hazırlaşarkən, qapı açılan anda həyat yoldaşı Bricit Makronun hər iki əli ilə onun üzünə yüngül şillə vurduğu kameralar tərəfindən qeydə alınıb. Hadisə “Associated Press” agentliyinin çəkilişi zamanı lentə alınıb.

Videoda Emmanuel Makronun bir anlıq çaşqınlıq yaşadığı, lakin tezliklə özünü toplayaraq ətrafdakıları salamladığı görünür. Təyyarədən enərkən Prezidentin həyat yoldaşının qoluna toxunmağa çalışsa da, Bricit Makronun buna reaksiya verməməsi diqqətdən yayınmayıb.

Hadisəyə ilkin olaraq Yelisey Sarayı tərəfindən təkzib gəlsə də, sonradan rəsmi açıqlamada görüntülərin ciddi mənaya malik olmadığı, yalnız səfər gərginliyi fonunda baş vermiş kiçik bir anlaşılmazlıq olduğu bildirilib.

Sosial mediada geniş yayılmış video bir çox istifadəçilər tərəfindən fərqli şəkildə şərh edilib, bəzi izləyicilər hadisəyə yumorla yanaşsa da, bəziləri bunu cütlüyün şəxsi münasibətləri kontekstində dəyərləndirib.

Hazırda hadisə ilə bağlı əlavə rəsmi açıqlama verilməyib.